ERMERA, 18 Jullu 2026 (TATOLI)-Ministru Obra Públika, Samuel Marçal, halo observasaun direita ba akampamentu husi empreza China Civil Engineering Construction Corporation (CCECC) husi Xina, ne’ebé sai manán na’in ba projetu konstrusaun no reabilitasaun Estrada Glenu ba Letefoho.
Governante hateten, objetivu husi vizita ne’e hakarak haree diretamente preparasaun akampamentu husi kompañia ne’ebé daudaun halo hela iha suku Eraulu molok halo konstrusaun ka reabilitasaun ba estrada husi Glenu ba to’o Letefoho.
“Imi hotu akompaña sira hahú serbisu ona ba akampamentu ninian, ida-ne’e hanesan base camp, ka fatin sentrál temporáriu ne’ebé kompañia halo hodi rai materiál konstrusaun no ekipamentu todan sira, entaun sira atu sira hahú serbisu ona, entaun buat hotu sei la’o tuir kalendáriu”, Samuel Marçal, hateten iha Ermera sábadu ne’e.
Fatin akampamentu ne’e rasik konstrui iha suku Eraulu, postu administrativu Letefoho, munisípiu Ermera.
“Ita agradese tanba daudaun tempu bailoron ona, entaun ha’u sempre hateten ba empreza katak aselera iha tempu bailoron ne’e, espera katak obra ne’e bele finaliza tuir kontratu ne’ebé iha, tanba sira-nia kontratu ne’e tinan ida, fulan ualu, signifika antes 2028 obra ne’e tenke finaliza, karik laiha udan ne’ebé impede, entaun tempu badak sira hahú halo serbisu ona tanba daudaun establese ona akampamentu”, nia dehan.
Kona-ba Obra ne’e nia parte fiar katak komunidade no parte hothotu koopera tinan ida fulan ualu estrada husi Glenu to’o Letefoho bele kompleta.
Lembra katak iha loron 26 Janeiru 2026, Governu Timor-Leste ofisialmente lansa projetu konstrusaun Estrada Urbana Glenu no Estrada Glenu-Letefoho.
Projetu estrada ne’e kobre dalan husi Letefoho (km 30+230) to’o Gleno (km 54+370), ho numeru kontratu TENDER/191/MOP-2024, sei halo konstrusaun durante loron 365 ho orsamentu $38.800.054,00, neʼebé implementa husi China Civil Engineering Construction Corporation (China).
Notisía relevante:Governu ofisialmente lansa projetu estrada Urbana Glenu no Glenu–Letefoho
Jornalista: Arminda Fonseca
Editór: Florencio Miranda Ximenes
