ERMERA, 18 Jullu 2026 (TATOLI)-Ministru Obra Públika, Samuel Marçal, akompaña husi Sekretáriu Estadu Asuntu Toponímia no Organizasaun Urbana, Germano Santa Brites, Vise-Ministru Administrasaun Estatál, Jacinto Rigoberto inklui komunidade sira, inaugura Gruta Ave Maria iha aldeia Poerema, suku Fatubolu, postu administrativu Hatulia B, munisípiu Ermera.
Gruta ne’e rasik orsamentu apoiu husi Governu liuhusi Ministériu Obra Públika, ne’ebé kontratu empreza Gurba Gurana Unipessoal Lda, kontrui durante fulan lima (10 Dezembru 2025-10 Maiu 2026) ho totál orsamentu $60.063,89.
Biban ne’e, Ministru Obra Públika Samuel Marçal, hateten gruta ne’ebé Governu konstrui ba komunidade ida-ne’e importante tebes tanba Governu la’ós hanoin de’it halo estrada, bee, eletrisidade maibé hadi’a mós fasilidade balun ba sarani sira hanesan konstrui kapela, igreja no gruta oinsá sarani sira halo misa no hadi’a sira-nia fiar ka fé ba Maromak ida-ne’e mós importante.
“Ita moris tanba Maromak, entaun buat hotu ne’ebé ita bele halo, maibé ita fiar buat hotu bele akontese tanba ho Maromak ninia bensaun, tanba ne’e Governu ne’ebé lidera husi Primeiru-Mimistru, Xanana Gusmão nia la’ós de’it haree ba estrada maibé tau mós importánsia ajuda halo kapela, igreja oinsá fasilita komunidade sira hasa’e sira-nia orasaun ba Maromak”, Samuel Marcal hateten iha suku Fatubolu sábadu ne’e.
Hafoin inaugura Gruta Ave Maria, membru Governu ne’e husu ba sarani sira atu tau atensaun didi’ak ba gruta refere nune’e fatin ne’e apoiu komunidade no sarani sira iha suku refere halo orasaun iha tempu susar no terus nia-laran tanba orasaun mak nu’udar solusaun ba problema hothotu.
Iha fatin hanesan, Reprezentante Prezidente Autoridade Munisípiu Ermera, José da Costa Gomes, hateten nia parte lori komunidade suku Fatubolu nia naran hato’o agradese tebes ba Governu ne’ebé fasilita ona sarani no komunidade iha suku ne’e hodi harii Gruta Ave Maria.
Nia dehan, Gruta Ave Maria rasik bainhira konstrui hetan apoiu fíziku másimu husi komunidade no sarani sira iha Fatubolu, no hetan akompaña mós husi Autoridade Munisípiu Ermera to’o finaliza ohin halo inagurasaun.
“Agradese ba Obra Públika tanba aleinde apoiu gruta ne’e nafatin mós apoiu nafatin ba infrastrutura ne’ebé daudaun kontinua la’o iha Ermera, ha’u husu sarani sira no komunidade iha fatin ne’e ba oin kuidadu nafatin gruta ne’e”, nia dehan.
Entretantu, Sarani Fatubolu Francisco Soares hateten nia parte hato’o agradese ba Governu tanba bele apoiu ona grupu boot ida-ne’e ba sira, nu’udar sarani lihuhosi gruta ne’e bele hametin liután sira-nia fiar ba Maromak.
Jornalista: Arminda Fonseca
Editor: Florencio Miranda Ximenes
