SÃO TOMÉ E PRÍNCIPE, 18 Jullu 2026 (TATOLI) – Xefe Missaun Observasaun Eleitorál (MOE) internasionál sira, iha Sabdu ne’e, realiza reuniaun koordenasaun iha Hotel Pestana, São Tomé, hodi avalia preparasaun ikus ba eleisaun prezidensiál ne’ebé sei realiza aban, loron 19 Jullu.
Inisiativa ne’e inklui halo distribuisaun observadór sira no diskusaun kona-ba asuntu sira relasiona ho prosesu eleitorál, seguransa no rezultadu husi enkontru sira ne’ebé antes ne’e kada delegasaun sira halo ona ho autoridade no parte interesada São Tomé e Príncipe nian.
Enkontru ne’e lidera husi Xefe MOE União Afrikana, Filipe Nyusi, no partisipa husi reprezentante União Europeia, Komunidade País Lian sira Portugés (CPLP, Sigla iha portugés), Komunidade Ekonómika Estadu Afrikanu Sentrál, Rede Órgaun Jurisdisionál no Administrasaun Eleitorál CPLP nomós g7+.
Xefe MOE g7+, Floyd Oxley Sayor, hatete ba Tatoli katak reuniaun ne’e fó oportunidade ba missaun observasaun hotu-hotu atu fahe informasaun kona-ba prosesu eleitorál no rezultadu kontaktu ho instituisaun sira iha São Tomé e Príncipe.
“Ohin, xefe missaun observasaun sira halo reuniaun ida ne’ebé União Afrikana mak koordena. Missaun observasaun hotu ne’ebé iha São Tomé no Príncipe partisipa hodi fahe informasaun ba malu kona-ba preparasaun kada misaun iha loron eleisaun,” dehan Floyd Oxley Sayor.»
Tuir Floyd Oxley Sayor, delegasaun sira aprezenta informasaun kona-ba reuniaun sira ho Prezidente Repúblika São Tomé e Príncipe, Carlos Manuel Vila Nova, no Primeiru-Ministru São Tomé e Príncipe, Américo d’Oliveira dos Ramos, inklui mós Tribunál Konstitusionál, autoridade eleitorál, forsa seguransa, sosiedade sivíl no entidade seluk ne’ebé envolve iha prosesu eleitorál.
Nia hateten, MOE g7+ mós fahe informasaun ne’ebé rekolla durante reuniaun sira ho autoridade nasionál, inklui ho Ministra Negósiu Estranjeiru, Kooperasaun no Komunidade, Ilza Amado Vaz, Xefe Estadu, Xefe Governu, Komandante Jerál Polísia Nasionál, Superintendente Aurito Vera Cruz, Ministra Ekonomia no Finansas Ruth Guadalupe, no organizasaun sosiedade sivíl sira.
“Polísia informa ba missaun katak sira prepara ona atu garante seguransa durante prosesu eleitorál no bele husu apoiu hosi Forsa Armada karik presiza,” dehan Floyd Oxley Sayor.
Komisáriu ne’e akresenta katak durante reuniaun ne’e, misaun observasaun internasionál sira mós konkorda atu halo konferénsia ba imprensa konjunta iha loron 21 Jullu, atu aprezenta deklarasaun preliminár kona-ba rezultadu observasaun eleisaun prezidensiál.
Notísia relevante: São Tomé e Príncipe: CEN esplika ba observadór internasionál sira kona-ba prosesu eleisaun prezidensiál
Jornalista: Afonso do Rosário
Editora: Isaura Lemos de Deus
