DILI 18 Jullu 2026 (TATOLI)- Tribunál Primeira Instánsia Dili (TJPID), sabadu ne’e, halo interogatóriu judisiál dahuluk ba Arguidu na’in-27 ne’ebé suspeitadu ba krime jogu ilísitu Scaming call Center iha Fomentu II ne’ebé Polísia Sientífika Investigasaun Kriminál (PCIC, sigla Portugés) kaer iha loron tersa (14/7) foin lalais ne’e.
Iha interogatóriu dahuluk ne’e, Ministeriu Públiku ne’ebé reprezenta husi Prokuradór Domingos Goveia Leite promeve arguidu sira ho krime Asosiasaun Kriminozu artigu 188, krime burla informátika artigu 268, jogu esplorasaun ilísitu ne’ebe previstu iha artigu 322, krime Brankamentu Kapitál 313 no Krime Fraude Fiskal 314 ne’ebé previstu iha Kódigu Penál Timor-Leste.
Nune’e iha alegasaun, Mínisteriu Públiku solisita ba Tribunál atu aplika medida koasaun ne’ebé todan liu ba Arguidu sira liga ho Scaming call Center iha Fomentu II tanba sira nia aktu prátika duni jogu Scaming call Center.Maibé, parte Defeza husi Arguidu sira la aseita nune’e husu Tribunál atu aplika de’it medida ne’ebé kaman.
Hafoin rona tiha parte hotu Tribunál hasai despaixu hodi fó medida koasaun Prizaun Preventiva ba Arguidu ida ne’ebé nudar ejerente ba fatin ne’ebé halo prátika aktu ilísitu jogu Scaming call center iha Fomentu II. Enkuantu Arguidu na’in-26 Tribunál aplika medida kuasaun.
Nune’e arguidu sira selu kausaun ho valór $4000, hahú sura husi despaixu Tribunál nian karik arguidu sira la selu kausaun ne’e sei hatan ba responsabilidade kriminál seluk.
Defeza husi Arguidu nain-neen, Advogadu Privadu José Pedro Camoes, hateten, arguidu hamutuk na’in-27 ne’ebé PCIC asegura no detein iha Fomentu II iha tersa foin lalais ne’e, iha arguidu na’in-ida Tribunál ohin aplika Prizaun Preventiva, enkuantu Arguidu na’in -26 seluk arguidu Tribunál aplika medida kuasaun ho osan $4.000.
“Ida ba L.J, mak hetan Prizaun Preventiva. Restu ne’e selu kausaun $4000. Desizaun eskrita sidauk notifika”, Pedro Camoes hateten ba TATOLI via Watshap sabadu ne’e.
Rekorda fali katak iha loron tersa (14/7) foin lalais ne’e Polísia Sientífika Investigasaun Kriminál hala’o operasaun hodi asegura no detein suspeitu na’in-27 ba kazu Scaming call Center iha Fomentu II Suku Komoru Postu-Administrativu Dom Aleixo Munisípiu Dili.
Notisia relevante:PM Xanana akompaña direta Autoridade Seguransa desmantela rede scam
Jornalista: Natalino Costa
Editor: Florencio Miranda Ximenes
