SÃO TOMÉ E PRÍNCIPE, 20 Jullu 2026 (TATOLI) – Kandidatu Prezidente Repúblika São Tomé e Príncipe, Carlos Vila Nova, no atuál Xefe Estadu, lidera provizóriu rezultadu provizóriu eleisaun prezidensiál ne’ebé realiza iha Domingu ne’e, ho 55,95% votu válidu, korresponde ba votu válidu 31.565, tuir dadus ne’ebé divulga husi Komisaun Eleitorál Nasionál (CEN, sigla portugés).
Dadus eleitorál hatudu katak tuir kedas ho kandidatu Nito d’Abreu, ho votu 23.394 (41,43%), Miques João Bonfim, ho votu 892 (1,58%), no Eugénio Tiny, ho votu 603 (1,07%).
Rezultadu apuramentu provizóriu indika mós katak iha eleisaun ne’ebé hala’o iha domingu ne’e, rejista eleitór hamutuk 142.191. Husi totál ne’e, sidadaun na’in-58.764 maka ezerse sira nia direitu votu, korresponde partisipasaun eleitorÁl hamutuk 54,62%, enkuantu eleitÓr na’in-83.427 maka la partisipa iha eleisaun ne’e.
Kontajen provizóriu ne’e inklui mós votu válidu 56.485, votu nulu 1.951 no votu branku (mamuk) 328.
Reasaun ba rezultadu provizóriu ne’e, Carlos Vila Nova afirma katak nia simu konfiansa ne’ebé hatudu hosi eleitór sira hanesan “kompromisu foun ida hodi kontinua serbí nasaun ho onestidade, independénsia, ekilíbriU no respeitu ba Konstituisaun”.
Atuál Xefe Estadu ne’e garante katak iha nia mandatu daruak ne’e sei “hakuak forsa polítika hotu, igreja, joven, feto, traballadór, emprezáriu, sidadaun hotu iha diáspora no sosiedade sivíl”, no defende katak “ema hotu sei hetan oportunidade ida hodi harii São Tomé e Príncipe ida ne’ebé justu, prósperu no unidu”.
Nune’e mós kandidatu Nito d’Abreu ne’ebé sai hanesan adversáriu prinsipál CarlosVila Nova iha eleisaun ne’e, simu rezultadu eleisaun ne’e no agradese ba ema hotu-hotu ba apoiu ne’ebé nia-hetan durante kampaña eleitorál no rekoñese kompromisu hosi nia apoiante sira iha prosesu ne’e.
“Ami agradese no rekoñese dedikasaun no partisipasaun ativa husi ema hotu ne’ebé apoiu ami-nia kandidatura iha jornada ida ne’e no iha prosesu eleitorál ida ne’e,” nia deklara.
Kandidatu ne’e hatutan tan katak, maske iha insidente balun ne’ebé rejista, nia konsidera katak prosesu eleitorál hala’o iha “ambiente festeja, marka ho partisipasaun populár durante kampaña tomak”.
Rezultadu provizóriu ne’e sei submete ba prosesu validasaun no sei anunsia husi Tribunál Konstitusionál São Tomé e Príncipe nian hodi prosede ho proklamasaun ofisiál tuir lei eleitorál ne’ebé vigora.
Notícia relevante: Eleisaun prezidensiál: sidadaun São Tomé e Príncipe sira-nia lian ba Prezidente Repúblika foun
Jornalista: Afonso do Rosário
Editora: Isaura Lemos de Deus
