DILI, 20 Jullu 2026 (TATOLI) – Embaixada Indonézia iha Dili louva asaun lalais ne’ebé Governu Timor-Leste, liuhusi Polísia Nasionál Timor-Leste (PNTL), liuliu Polísia Investigasaun Kriminál (PCIC), no ajénsia imlementadora lei relevante sira foti hodi halakon rede scam online ne’ebé foin lalais ne’e espalla iha nasaun.
Bazeia ba nota imprensa ne’ebé Tatoli asesu, esforsu sira ne’e reflete kompromisu Governu Timor-Leste nian hodi mantein seguransa nasionál no hametin kooperasaun hodi halakon krime transnasionál iha rejiaun ASEAN.
Iha operasaun oioin ne’ebé hala’o husi fin Juñu to’o meadu Jullu 2026, autoridade sira Timor-Leste nian konsege deskobre fatin oioin ne’ebé deskonfia sai hanesan sentru ba atividade bosok online nian no kaer ona sidadaun estranjeiru 100-resin, inklui sidadaun indonéziu balun ne’ebé deskonfia envolve iha atividade sira-ne’e.
Embaixada Indonézia iha Dili kontinua halo koordenasaun maka’as ho autoridade Timor-Leste nian hodi hetan informasaun kona-ba sidadaun indonézu sira ne’ebé detidu no atu garante sira-nia direitu konsulár kumpre tuir Konvensaun Viena 1963 kona-ba Relasaun Konsulár.
Embaixada Indonézia mós garante katak sira-nia direitu legál hetan ona, prontu atu fó asisténsia konsulár, no prontu atu fasilita kooperasaun entre Timor-Leste no ofisiál implementadór lei Indonézia nian iha investigasaun ne’ebé la’o hela, sein interfere ho prosesu legál ne’ebé la’o hela.
Governu Indonézia apoia tomak esforsu sira atu halakon krime transnasionál, inklui bosok online, jogu online, tráfiku umanu, krime finanseiru, no krime sibernétiku sira seluk. “Governu Repúblika Indonézia iha toleránsia zero ba envolvimentu sidadaun Indonéziaiha atividade kriminál sira iha rai-li’ur no respeita tomak prosesu aplikasaun lei ne’ebé hala’o husi Governu Timor-Leste tuir lei aplikavel”, nota ne’e dehan.
Tanba ne’e, embaixada sei kontinua hametin koordenasaun ho Governu Timor-Leste no ajénsia relevante sira iha Indonézia hodi fó apoiu ba esforsu hamutuk hodi halakon krime transnasionál, partikularmente iha rejiaun ASEAN, hodi garante nafatin protesaun no kumprimentu ba direitu sidadaun Indonézia nian durante prosesu legál.
Notísia relevante: Xanana: Presiza reforsa intelijénsia atu kombate rede scam online iha Timor-Leste
TATOLI
