España sai kampiaun iha Kopa Mundiál 2026 hafoin halakon Arjentina 1-0

DILI, 20 Jullu 2026 (TATOLI)—España sai kampiaun iha Kopa Mundiál 2026 hafoin halakon Arjentina ho 1-0 iha jogu finál ne’ebé realiza segunda madrugada iha Nova Jersey Estadu Unidu Amérika (EUA).

Iha primeira parte, España blokeia kompletamente Arjentina nia movimentu no jogu. Albiceleste laiha oportunidade perigozu, la iha suta ida ba alvu maibé España mós laiha oportunidade barak ne’ebé ameasa duni, maske rejista suta rua iha alvu.

Aleinde lori Nicolas Otamendi hodi troka Lisandro Martinez ne’ebé kanek iha finál primeira parte, Lionel Scaloni deside lori Leandro Paredes hodi muda buat sira. Paredes tama iha fatin Nico Gonzalez nian.

Bainhira de’it segunda parte hahú, España ameasa kedas. Alex Baena halo redusaun no suta ida hosi liur área penalidade nian. Bola ne’e salva husi Emiliano Martinez.

Iha minutu 52, tensaun maka’as. Ida-ne’e mosu tanba falta ida-ne’ebé halo husi Leandro Paredes hasoru Rodri iha meiu-kampo. Jogadór sira hosi parte rua hasoru malu iha pontu insidente nian no Paredes hetan kartaun mean.

Liutiha minutu balun, Dani Olmo halo redusaun perigozu, maibé nia pasajen hetan hamoos hosi Gonzalo Montiel. Hafoin ne’e Montiel hasai no troka ho Nahuel Molina iha minutu 58.

Besik minutu 15 iha segunda parte, Luis de la Fuente mós deside katak España presiza enerjia foun. Ferran Torres no Pedri tama hodi troka Oyarzabal no Fabian Ruiz iha minutu 62.

Iha minutu 63, Dani Olmo hatama filafali remate husi kaixa penalidade nia liur. Emiiano Martinez trava suta, maibé la konsege kaer ho di’ak.

Liutiha minutu haat, Ferran Torres konsege suta husi kruzamentu husi Lamine Yamal maibé Emiliano Martinez konsege lee bola ho di’ak.

Lionel Scaloni halo tan substituisaun ida hafoin deskansa hidratasaun nian. Facundo Medina no Giuliano Simeone lori mai hodi apoia atake.

De La Fuente mós la tuur hakmatek. Nico Williams no Mikel Merino hetan hasai iha minutu 75. España nia atake sai maka’as liután.

Aprezenta ameasa rua tuituir malu. Primeiru liu husi Pedri depois liu husi Pau Cubarsi. Maibé, sira na’in rua hetan frustrasaun hosi Emiliano Martinez.

Emiliano Martinez maka’as tebes iha segunda parte. Nia halo salvasaun krusiál oioin ne’ebé mantén eskoru iha 0-0.

Iha minutu lima ikus jogu nian, España iha ona suta ualu ba alvu. Arjentina, entretantu, seidauk koko Unai Simon dala ida.

Iha tempu lezaun nian, Nico Williams halo kontra-atake no lansa suta ida ne’ebé maka’as. Emiliano blokeia fali suta ne’e.

Insidente seluk akontese lakleur depois. Bainhira bola ne’e halai ba kampu nia klaran, Enzo Fernandez halo falta ba Cubarsi iha duelo ida ba bola. Enzo hetan kartaun mean daruak no hetan hasai.

España hetan suta livre iha minutu ikus. Lamine Yamal lansa suta ida ne’ebé perigozu, maibé Emiliano Martinez salva ida-ne’e.

Eskoru mantein 0-0, no jogu ne’e tama iha tempu adisionál.

Hafoin empata laiha golu iha tempu normál, jogu ne’e tama iha tempu adisionál. España halo kedas presaun ba bola desde inísiu primeira parte.

Nico Williams sai hanesan ameasa ida iha minutu 93. Ninia kabesa hetan salva husi Emiliano Martinez.

Nico Williams ikus mai konsege hetan rede kotuk iha minutu 96. Williams aproveita iha luta ida iha kaixa penalti arjentinu nian.

Maibé, árbitru Slavko Vincic la permite golu ne’e. Vincic konsidera hanesan falta ida iha preparasaun. Mikel Merino sama Nicolas Otamendi nia ain molok bola nakfera ba Williams.

Iha minutu 103, Mikel Merino kabesa halo kruzamentu husi Nico Williams. Maibé, bola ne’e la’o dook de’it hosi poste karuk.

Hafoin mantein 0-0 iha primeira parte hosi tempu adisionál, España ikusmai hatama iha inísiu segunda parte.

Ferran Torres marka golu hodi lori España ba vantajen iha minutu 106. Bainhira de’it jogu hahú, España halo kedas presaun.

Pedro Porro nia kruzamentu ba poste dook hasoru hosi Nico Williams. Envezde suta, Nico dirije kabesa ida ba Ferran Torres.

Ferran Torres livre no lansa suta ida ne’ebé maka’as. Bola ne’e semo liu husi baliza arjentina nian, liu husi Emiliano Martinez nia kontrolu.

Iha minutu 113, Ferran Torres konsege fali haruka bola tama ba baliza arjentina nian. Maibé, dala ida-ne’e nia hetan deklarasaun offside bainhira simu bola liuhosi.

Tama ba minutu ikus, Arjentina fó ameasa maka’as ba baliza españól. Giuliano Simeone iha oportunidade atu suta, maibé nia suta liu barra.

Antes ne’e, España domina minutu 90 tomak. Sira iha totál suta 10 iha alvu, maibé laiha ida maka rezulta iha golu.

Iha kontraste, Arjentina hetan kompletamente dominadu hosi España. Lionel Messi ho nia kolega sira labele halo buat barak no la rejista mós suta ida.

España (4-2-3-1)
Unai Simon; Pedro Porro, Pau Cubarsi, Aymeric Laporte, Marc Cucurella; Rodri, Fabian Ruiz (Pedri 62); Lamine Yamal, Dani Olmo (Mikel Merino 75), Alex Baena (Nico Williams 75); Mikel Oyarzabal (Ferran Torres 62)

Arjentina (4-4-2)
Emiliano Martinez; Gonzalo Montiel (Nahuel Molina 58), Cristian Romero (Facundo Medina 70), Lisandro Martinez (Nicolas Otamendi 44), Nicolas Tagliafico; Rodrigo De Paul (Giuliano Simeone 70), Alexis Mac Allister, Enzo Fernandez, Nico Gonzalez (Leandro Paredes 45); Lionel Messi, Julian Alvarez.

Jornalista : Hortêncio Sanchez

Editór        : Cancio Ximeens