Estrutura Partidu CNRT Aileu lamenta PAM João Bosco dos Santos utiliza logotipu CNRT

AILEU, 20 Jullu 2026 (TATOLI)—Estrutura partidu CNRT Munisípiu Aileu lamenta ho asaun husi Prezidente Autoridade Munisípiu Aileu, João Bosco dos Santos, ne’ebé hakerek karta deklarasaun privadu ho vítima AMA hodi utiliza logotipu Partidu Konsellu Nasionál Rezisténsia Timorense (CNRT) nian.

Notísia Relevante: PM Xanana suspende PAM Aileu no hatama hikas vítima AMA ba servisu

“Deklarasaun entre João Bosco dos Santos ho AMA konsidera asuntu privadu no la envolve ho Partidu CNRT. Ha’u rasik nu’udar Koordenadór Partidu CNRT Munisípiu Aileu laiha koñesimentu kona-ba asuntu refere,” Koordenadór Jerál Partidu CNRT iha Munisípiu Aileu, Rogério Araújo Mendonça, ne’e hateten iha konferénsia imprensa ne’ebé hala’o iha sede CNRT Aileu, ohin.

Nia Dehan, estrutura Partidu CNRT Munisípiu Aileu observa katak utilizasaun atributu (logotipu) partidu nian ba interese pesoál ne’e kontra tebes estatutu partidu CNRT, tanba ne’e sira deside hodi realiza konferénsia imprensa ba loron ohin.

“Nu’udar koordenadór partidu CNRT Munisípiu Aileu, hakarak subliña liutan katak sei aprezenta situasaun refere, inklui enkamiña keixa husi vítima ba komisaun polítika nasionál (CPN) ho Komisaun Juridisaun Partidu CNRT nian iha nasionál, atu loke prosesu tuir estatutu partidu CNRT nian,” nia dehan.

Tanba, nia dehan, iha estatutu partidu CNRT iha artigu nú. 18° ko’alia kona-ba “sansaun” no iha aliñea dahuluk hateten katak membru sira bele hetan sansaun ka kastigu dixiplinár husi Partidu CNRT ba sira-nia hahalok ne’ebé prejudika ka viola prinsípiu Partidu CNRT nian.

Enkuantu, nia hatutan, Partidu CNRT nu’udar partidu polítiku ida-ne’ebé rekoñese feto nia partisipasaun esensiál tebes ba dezenvolvimentu ida-ne’ebé justu liu, nasionál no sosiedade, hodi promove igualdade jéneru no partisipasaun ativu feto nian iha prosesu foti desizaun, tantu iha partidu nia laran nomós iha setór oioin.

“Nune’e, hodi estrutura partidu CNRT Munisípiu Aileu nia naran solidariza situasaun ne’ebé mak AMA enfrenta. Ami komprometidu atu akompaña ho besik liután ba situasaun ida-ne’e,” nia hateten.

Prezidente Autoridade Munisipál (PAM) Aileu, João Bosco dos Santos suspende provizóriu husi Sekretáriu Ezekutivu Partidu CNRT Munisípiu Aileu

Nune’e, nia hatutan, estrutura partidu CNRT Munisípiu Aileu kompostu husi postu haat iha hanoin hamutuk hodi deside suspende provizóriu João Bosco dos Santos husi Sekretáriu Ezekutivu Partidu CNRT Munisípiu Aileu no loke prosesu investigasaun, entaun bandu nia atu hola parte iha atividade partidu nian hodi hein desizaun husi Komisaun Polítika Nasionál (CPN).

“Ami ko’alia ona ho nia (JBS) no nia hatan katak bainhira nia sala entaun nia sei simu realidade importante mak partidu keta mate ho serbí rai ida-ne’e,” nia dehan.

Antes ne’e, tuir deklarasaun husi Prezidente Autoridade Munisípiu Aileu, João Bosco dos Santos, iha loron 07 Jullu 2026 katak buat hotu ko’alia tuir faktu no evidénsia uza logotipu CNRT tanba karta ne’ebé halo bazeia ba keixa ne’ebé mós ba maun boot (Prezidente Partidu CNRT, Xanana Gusmão) ne’ebé iha parte ida privada no parte ida liga ho polítika.

“Liga ho polítika tanba hotu-hotu hakarak sai PAM, entaun ema buka maneira oinsá mak ami atu hamonu malu. Nune’e mak karta ida-ne’e husi Koordenadór Klibur Profisionál Partidu CNRT ne’ebé dirije ba estutura superiór CNRT,” PAM Aileu ne’e hateten ba jornalista sira iha ninia rezidénsia Aileu.

Nia hatutan, kestaun ne’ebé liga ba partidu nia tenke haruka ba partidu la’ós ba Governu, tanba Governu mak ukun povu, keixa ne’ebé nia simu husi AMA indika ba partidu nian (direta ba estrutura superiór CNRT), tanba ne’e mak nia uza logotipu partidu no utilizasaun atributu partidu atu sai sasin, entaun sei afeta ba buat ida.

Jornalista : Alexandra da Costa

Editór        : Cancio Ximenes