DILI, 20 Jullu 2026 (TATOLI)–Konsellu Superiór Majistratura Judisiária (KSMJ), iha Kinta (02/07), konvoka reuniaun hodi delibera nomea Juíz Yudi Pamukas troka Juiza Edite Palmira lidera fali Tribunál Judisiál Primeira Instánsia Dili (TJPID) ba mandatu tinan-tolu, hahú tinan 2026 to’o 2029 tuir Lei Organizasaun Judisiária.
Iha sesaun ordinária ba dala-12 Konsellu Superiór ba Majistratura Judisiál, ne’ebé hala’o iha loron 02 Jullu 2026, tuku 10:00, iha sala sesaun, partisipa membru Konsellu nian, marka prezensa husi Prezidente Tribunál Rekursu. Afonso Carmona, no Konselleiru sira hanesan Jeremias Pereira, Fernando Lopes de Carvalho no Alexandre Gentil Corte-Real de Araújo.
“Juíz ne’ebé Konsellu delibera no hetan nomeasaun ba kargu Juíz Administradór Tribunál Judisiál Primeira Instánsia mak hanesan Juíz Yudi Pamukas nomeadu atu ezerse funsaun hanesan Juíz Administradór ba Tribunál Judisiál Primeira Instánsia Dili troka Juiza Edite Palmira dos Reis,” referidu komunikadu ne’ebé Ajénsia TATOLI asesu, Segunda ne’e.
Notísia relevante : Juiza Edita Palmira sei substitui Afonso Carmo lidera TJPID
Tuir KSMJ nia kompeténsia no hafoin halo apresiasaun ba matéria ne’ebé konstitui orden traballu nian, hetan ona deliberasaun ho unanimidade husi membru prezente sira atu nomea Juíz Direitu sira tuirmai atu ezerse funsaun hanesan Juíz Administradór ba Tribunál Judisiál Primeira Instánsia.
Juíz Evangelino Belo nomeadu atu ezerse funsaun hanesan Juíz Administradór ba Tribunál Judisiál Primeiru Instánsia Baukau hodi troka Juiza Maria Modesta Vieira.
Juiz Samuel Pacheco nomeadu atu ezerse funsaun hanesan Juíz Administradór ba Tribunál Judisiál Primeiru Instánsia Suai hodi troka Juíz Naasson M.A.M. Sarmento.
Juiza Zulmira A. Silva Barros nomeada atu ezerse funsaun hanesan Juiza Administradora ba Tribunál Judisiál Primeiru Instánsia Oekusi troka Juíz Evangelino Belo.
Nomeasaun ne’e públika Jornnál Repúblika ba efeitu legál ne’ebé nesesáriu. Nomeasaun ne’e asina ona husi Prezidente Konsellu Superiór Majistratura Judisiária, Afonso Carmona.
Jornalista : Natalino Costa
Editora : Julia Chatarina
