DILI, 21 Jullu 2026 (TATOLI)—Diretor Ezekutivu Ajénsia Dezenvolvimentu Nasionál, Januario Maia Guterres, informa ADN atualiza progresu projetu infraestrutura liuliu servisu inspesaun no verifikasaun ne’ebe durante ne’e ADN hala’o ba Primeiru-Ministru, Kay Rala Xanana Gusmao.
“Progresu projetu infraestutura ne’ebe ami atualiza ba PM ne’e jeral ka la’os de’it infraestrutura bazika maibe mós konstrusaun edifisiu sira, liuliu balun ne’ebe implementa ona, iha hela konkursu, asina kontratu no balun iha prosesu verifikasaun dokumentu,” Diretor Ezekutivu ADN ne’e informa ba jornalista sira iha nia kna’ar fatin, Hudi Laran, ohin.
Nia hatutan, kona-ba atinjimentu ba projetu infraestrutura Governu nian ne’e iha ninia persentajen ne’ebe mak lahanesan no sira labele define loloos tanba projetu balun sei iha konkursu, balun implementa ona no balun seidauk.
Maibé, nia dehan, husi atividade monitorizasaun ne’ebe ADN halo durante ne’e iha mudansa liuliu involvmentu enjiñeiru timoroan iha projetu infraestrutura nian.
Tanba, nia dehan, durante ne’e kuaze enjiñeiru iha kompañia ida envolve husi ema estranjeiru, entaun signifika katak timoroan barak mós iha ona kapasidade tékniku atu kontrola ka maneja projetu sira-ne’e.
Entretanu, nia informa, husi Janeiru to’o Jullu 2026 ne’e, ADN verifika ona dokumentu tékniku hamutuk projetu 359 no pedidu ba inspesaun pagamentu hamutuk 410.
Jornalista : Alexandra da Costa
Editor : Cancio Ximenes
