DILI 21 Jullu 2026 (TATOLI)—Ekipa konjunta kompostu husi Polísia Nasionál Timor-Leste (PNTL), liuhusi Diresaun Servisu Investigasaun Kriminál (DSIK) no Diresaun Servisu Informasaun Polísia (DSIP), hamutuk ho Servisu Informasaun N2 husi FALINTIL–Forsa Defeza Timor-Leste (F-FDTL), Tersa ne’e, konsege desmantela tan rede scam call center iha área Bairru Sentrál, Aldeia Ailok-laran, Suku Hera, Postu Administrativu Kristu Rei, Munisípiu Dili.
Operasaun ne’e hala’o pur volta tuku 11:30 nune’e konsege detein sidadaun estranjeiru na’in-21.
Operasaun ne’e lidera husi Diretór interinu Servisu Investigasaun Kriminál no atuál Xefe Departamentu Forense, Superintendente Asistente Polísia Mouzinho Tavares Correia.
Notísia relevante : Tribunál aplika prizaun preventiva ba arguidu Scaming call Center iha Fomentu II
Durante operasaun, ekipa konsege halo apreensaun evidénsia barak, hanesan ekipamentu rede internet Starlink, laptop, telemóvel, kadeira, meza, pasaporte no ekipamentu seluk tan ne’ebé sei iha prosesu identifikasaun no analiza husi autoridade kompetente atu determina ho lolos objetu sira ne’ebé utiliza ba atividade kriminál, hafoin atualiza dadus finál ba públiku atu akompaña nia prosesu to’o final.
Diresaun Servisu Investigasaun Kriminál daudaun ne’e lori ona suspeitu sira bá edifísiu DSIK Komandu Jerál PNTL Kaikoli hodi kontinua hala’o investigasaun atu apura faktu hotu relasiona ho kazu ida-ne’e no determina responsabilidade legál husi ema sira ne’ebé envolve.
Rekorda katak molok ne’e Diretór Servisu Investigasaun Kriminál, Superintendente Xefe Polísia João Belo dos Reis, hateten, PNTL reafirma nia kompromisu atu kombate kriminalidade transnasionál no atividade ilegál sira ne’ebé bele ameasa seguransa públika no estabilidade nasionál.
“Apela ba komunidade atu kontinua fó informasaun ba autoridade sira bainhira haree ka hatene atividade suspeitu sira atu hamutuk bele mantein seguransa no ordem públika iha Timor-Leste,” nia tenik.
Jornalista : Natalino Costa
Editora : Julia Chatarina
