BOBONARU, 21 Jullu 2026 (TATOLI) – Komunidade iha aldeia Ai-Aras to’o Aibou, suku Soilesu, postu administrativu Maliana, munisípiu Bobonaru, kontinua hasoru difikuldade atu asesu ba bee-moos durante tempu bailoro, tanba ne’e obriga sira sosa bee tanke ida $50 kaatu sustenta moris loroloron.
Xefe Aldeia Ai-Aras, Beatriz dos Santos, hatete katak problema ne’e akontese tanba bee-moos husi Tapo la to’o ba komunidade tanba ema balun hasai tiha torneira iha liña distribusaun nian.
“Ami Ai-Aras to’o bá Aibou preukupa tebetebes ba bee-moos. Kuandu bailoro sosa bee tanke $50 ba ami-nia moris. Tanba bee-moos husi Tapo la to’o mai ami”, nia hateten iha Soilesu, tersa-feira ne’e.
Beatriz haktuir katak iha tinan hirak liubá, ajensia internasionál no parte relevante sira halo ona levantamentu dadus ba bee-matan rua, Boro no Tulikhun, ne’ebé baliza ho munisípiu Ermera, maibé to’o agora laiha rezultadu atu rezolve problema falta bee ne’e.
“Ami preukupa tebes kuandu bee maran komunidade bá kuru iha mota, haris moos iha mota, ne’ebé iha motór bele bá, laiha labele bá. Bee-moos susar liu ba ami husi Ai-aras to’o Aibou”, nia lamenta.
Xefe Suku Soilesu, Marito Victor da Costa, konfirma katak problema bee-moos sai dezafiu boot ba komunidade tomak kada tama iha tempu bailoro.
“Família sira ne’ebé laiha osan bá kuru iha mota iha Ai-Aras. Dalaruma inan isin-rua sira bá kuru bee dadeer no filafali loraik tanba distánsia dook. Iha 2002, ajensia internasionál sira mai suku Soilesu aldeia Ai-aras no aldeia Soilesu sorin balun, maibé to’o agora sistema ida ne’e la funsiona”, nia haktuir.
Durante tempu udan, komunidade la hasoru difikuldade boot ba bee, maibé bainhira tama tempu bailoro asesu ba bee-moos sai kestaun ne’ebé afeta diretamente ba moris no saúde komunidade.
Aldeia Ai-Aras iha uma-kain hamutuk 150-resin ho totál membru família hamutuk 800-resin, ne’ebé hotu-hotu presiza asesu ba bee-moos ne’ebé sufisiente.
Notísia relevante: Populasaun loke dalan foun 1,5km husi Soilesu bá Loubonu no Obulo
Jornalista: Sergio da Cruz
Editora: Maria Auxiliadora
