MP propoin aplika prizaun preventiva ba arguidu na’in-ida ba kazu scam iha Kuluhun
DILI, 21 Jullu 2026 (TATOLI)–Tribunál Judisiál Primeira Instánsia Dili (TJPID), Tersa ne’e, liuhusi Juíz Estájiariu, Rozito Guterres, kontinua realiza interrogatóriu dahuluk ba sidadaun estranjeiru hamutuk na’in-19, ne’ebé Polísia Sientífika Investigasaun Kriminál (PCIC, sigla portugés) detein iha Sesta (17/07), iha área Kuluhun.
Iha prosesu ne’e, Tribunál halo identifikasaun no rona arguidu na’in-tolu nia deklarasaun nune’e deside hodi tama ba Ministériu Públiku (MP) nia alegasaun inklui parte Defeza nian.
Prokuradór Rafael Gusmão iha biban ne’e promove ho krime burla informátika, asosiasaun kriminozu no brankamentu kapitál.
Iha alegasaun, MP propoin ba Tribunál atu aplika medida koasaun prizaun preventiva ba arguidu ho inisiál Q, enkuantu ba arguidu na’in-18 seluk aplika medida koasaun proibisaun auzénsia no medida kausaun $ 5.000.
Notísia relevante : Xanana: Presiza reforsa intelijénsia atu kombate rede scam online iha Timor-Leste
Maski nune’e, parte Defeza ba arguidu, Advogadu Privadu, Octávio Cardoso la aseita MP nia alegasaun no husu atu aplika medida koasaun aprezentasaun períodika, medida proibisaun auzénsia, enkuantu medida kausaun aplika bazeia ba arguidu sira-nia forsa.
“Iha alegasaun Ministériu Públiku nia husu Tribunál atu aplika medida koasaun prizaun preventiva ba arguidu na’in-ida ho inisiál Q no arguidu na’in-18 aplika medida koasaun aprezentasaun períodika. Ba arguidu na’in-ida mak Ministériu Públiku husu Tribunál atu aplika medida proibisaun auzénsia no arguidu na’in-17 ne’e husu medida kausaun $5.000 ba kada arguidu,” nia akresenta.
Tanba ne’e, MP husu Tribunál atu aplika medida haat hanesan prizaun preventiva, aprezentasaun períodika, proibisaun auzénsia no medida kausaun $5.000.
Enkuantu, parte Defeza husu Tribunál atu aplika medida koasaun adekuadu karik iha indísiu forte ba envolvimentu ne’e, tanba sei iha faze investigasaun no ba MP nia alegasaun medida kausaun $5.000 ne’e filafali ba Tribunál nia desizaun.
“Prizaun preventiva ne’e ha’u la konkorda maibé nafatin entrega ba Tribunál tuir buat ne’ebé mak prodús iha primeiru interrogatóriu,” nia katak.
Hafoin rona tiha parte sira, Tribunál deside muda sesaun ba Kuarta (22/07) tuku 11:00 hodi rona despaisu ikus.
Jornalista : Natalino Costa
Editora : Julia Chatarina
