BOBONARU, 22 Jullu 2026 (TATOLI) – Grupu tolu benefisiáriu Programa Abitasaun Komunitária husi Ministériu Dezenvolvimentu Rurál no Abitasaun Komunitária (MDRAC) iha aldeia Korluli, suku Ritabou, postu administrativu Maliana, munisípiu Bobonaru, kontinua dezenvolve atividade haki’ak ikan, manu no fahi ho rezultadu pozitivu.
Maski nune’e, asesu ba merkadu no folin hahán ba animál ne’ebé aas sei sai preokupasaun prinsípál ba membru grupu sira.
Xefe Armazein Grupu Haki’ak Ikan, Augusto Mau Buti, hateten katak grupu halo kolleta dahuluk no konsege hetan rendimentu besik rihun $3. Husi montante ne’e, balun uza filafali atu sosa fini ikan no restante $2.500 rai hela iha konta grupu nian.
“Ami-nia rendimentu di’ak tanba merkadu mai rasik to’o ami-nia fatin, la presiza lori ikan bá Maliana”, Augusto informa ba jornalista sira, ohin.
Nia esplika katak grupu hakarak konstrui tan tanke foun, maibé folin hahán ne’ebé aas sai obstákulu boot ba espansaun atividade.
“Ami rekomenda ona ba ministériu atu prepara mós mákina ruma hodi prodús ninia pakan. Ida-ne’e mak ami hakarak tebes, atu osan la hasai barak liu ba sosa pakan, tanba ami sura despeza ba pakan ne’e mak boot liu”, nia dehan.
Iha parte seluk, Xefe Grupu Haki’ak Manu, Maria Juvenia Madeira, hateten katak atividade haki’ak manu fó ona benefísiu ba membru grupu sira. Iha etapa dahuluk grupu hetan rendimentu liu $7.000, etapa daruak $5.190 no etapa datoluk mak tún fali ba $3.500, tanba manu balun mate. Enkuantu etapa dahaat, empreza seidauk fornese fini to’o agora, maski grupu hato’o ona pedidu dezde Janeiru.
Nia dehan mós katak grupu hasoru difikuldade iha merkadu tanba tempu haki’ak manu limitadu ba loron 28.
“Liu tempu ida ne’e, ami tenke hola hahán, entaun ba merkadu ami fa’an fa’an $6,50, ema balun fa’an $5, entaun ami hetan uitoan de’it”, nia dehan.
Koordenadór Sentru Dezenvolvimentu Aldeia, Anacleto da Costa Araújo, hateten atividade grupu haki’ak ikan, manu no fahi kontinua la’o, maibé haki’ak manu mak sei hasoru dezafiu boot liu.
“Problema boot mak merkadu. Kompetisaun aas no manu barak mate. Dalaruma hola manu 1.000, maibé bainhira atu fa’an la to’o numeru ne’e tanba balun mate”, nia relata.
Nia akrexenta katak grupu sira presiza halo planeamentu merkadu ne’ebé di’ak atu asegura produtu sira bele hetan merkadu ho folin ne’ebé razoavel no hamenus risku prejuízu.
Grupu tolu benefisiáriu ne’e hetan apoia orsamentál husi Governu hamutuk rihun $50, hodi dezenvolve atividade haki’ak animál.
Notísia relevante: Komunidade husu auditoria ba Programa Haki’ak Manu Mareko ne’ebé paradu iha Tunubibi
Jornalista: Sergio da Cruz
Editora: Maria Auxiliadora
