DILI, 22 Jullu 2026 (TATOLI)—Governu liuhusi reuniaun Konsellu Ministru, Kuarta ne’e, aprova Dekretu-Lei nú. 18/2012, 04 Abríl, kona-ba subsídiu apoiu kondisionál “Bolsa da Mãe” ba edukasaun pré-eskolár no ensinu sekundáriu, ne’ebé aprezenta hosi Ministra Solidariedade Sosiál no Inkluzaun, Verónica das Dores.
Alterasaun Dekretu-Lei nú. 18/2012, 04 Abríl, ida-ne’e ho objetivu atu habelar ámbitu apoiu ba edukasaun pré-eskolár no ensinu sekundáriu, hodi reforsa kna’ar subsídiu nu’udar instrumentu ida ba promosaun inkluzaun edukativa hahú husi faze inisiál dezenvolvimentu nian no la’ós de’it ensinu báziku.
Objetivu prinsipál alterasaun ne’e mak atu reforsa programa Bolsa da Mãe hodi fó apoiu ba família vulnerável sira ho labarik.
Objetivu seluk mak atu halo mudansa ba montante subsídiu mensal tuir nível eskolár labarik nian: Hanesan ba labarik iha ensinu primeiru siklu ho montante $8, ba labarik iha ensinu segundu siklu ho montante $9, ba labarik iha terseru siklu no ensinu sekundáriu $10.
Objetivu prinsipál seluk mak ba labarik ho defisiénsia ne’ebé frekuenta eskola hetan tan $5 iha leten husi montante normál, no revoga programa Bolsa da Mãe – Nova Geração no integra fila-fali apoiu ba sistema Bolsa da Mãe atu programa ne’e sai simples liu, sustentável no fó prioridade ba edukasaun no bem-estar labarik sira.
Jornalista : Alexandra da Costa
Editór : Cancio Ximenes
