PM Xanana fó apresiasaun ba estudante ne’ebé manán iha kompetisaun siénsia Internasionál
DILI, 22 Jullu 2026(TATOLI)—Primeiru-Ministru, Kay Rala Xanana Gusmão, hamutuk ho membru IX Governu Konstitusionál fó apresiasaun ba estudante timoroan sira-ne’ebé manán medalla ba kompetisaun siénsia internasionál 11.ª ASEAN Plus Three Junior Science Odyssey (APT JSO) iha Filipina no Malázia, husi 05-11 Jullu 2026.
Governu hato’o parabéns ne’e iha reuniaun Konsellu Ministru (KM), kuarta ne’e, tanba delegasaun Timor-Leste ka reprezentante estudante timoroan sira konsege rekolla medalla osan-mean ida, osan-mutin tolu no bronze rua.
Primeiru-Ministru, Kay Rala Xanana Gusmão, elojia ho dedikasaun, perseveransa no talentu estudante sira no konsidera sira-nia susesu nu’udár fonte orgullu nasionál no inspirasaun bá foin-sa’e timoroan sira atu kontinua buka prestasaun iha área siénsia, teknolojia, inovasaun ho edukasaun.
“Apresiasaun mós bá profesór sira, lideransa eskola no família sira-ne’ebé fó apoiu ba dezenvolvimentu estudante sira-nian hodi reprezenta Timor-Leste ho di’ak iha nível internasionál,” PM Xanana hateten iha sala reuniaun Konsellu Ministru, Palásiu Governu, ohin.
Xefe Governu dehan, kompetisaun anuál ne’e halibur estudante sira husi Estadu membru ASEAN sira no parseiru tolu husi bloku Nordeste Aziátiku nian – Xina, Japaun no Koreia-Súl – hodi promove koñesimentu sientífiku, inovasaun, kriatividade no kooperasaun rejionál.
“Nune’e ida-ne’e mós enkoraja kolaborasaun kona-bá siénsia, sustentabilidade no dezenvolvimentu abilidade sira sékulu XXI nian,” nia ddehan.
Timor-Leste reprezenta husi estudante na’in-neen hosi eskola sira iha Dili mak hanesan Alandrinho Corbafo Caunan husi Colégio Paulo VI; Angelica da Costa Sequeira husi Eskola Bázika Sentrál (EBC) Bidau Akadiruhun; Mendelina del Carmen Mascarenhas husi EBC 30 de Agosto; Nelia Patricio Soares husi EBC São Pedro; Peter Carlos Chima Anaje husi EBC São José Operário; no Salvadór da Costa Pacheco husi EBC Esperança da Pátria.
Liutiha loron balun, Estudante sira husi Eskola Ensinu Báziku St. António Teulale (ESSA Senior) no Eskola Sekundária St. António Teulale (ESSA Senior) iha Baucau, ho medalla 10 no Prémiu Embaixadór Juventude hafoin dezempeñu ne’ebé destakadu iha Konferénsia Siénsia, Teknolojia, Inovasaun no Kreatividade (STICK2020).
Enkuantu delegasaun Timor-Leste manán medalla osan-mean lima reprezenta husi Angel Grace Costa De La Rosa, Yinei Doena Maria Da Costa Belo, Jeninho Geovanio Maria Alves Xavier, Geovania Bruno Sarmento, Brigida Filita Da Costa Guterres.
Manán osan-mutin lima reprezenta husi Florbella Ezania Osório Da Silva, Letícia Greydis Costa Valente, Jolly Petra Daol, Genijia Lucilia Imaculada Pereira, Herfia Febiana Carlos iha kompetisaun internasionál Siénsia, Teknolojia, Enjeñaria, Arte, no Matemátika (STEAM) ne’ebé hala’o iha Kuala Lumpur husi loron 15 to’o 19 jullu, hodi marka dezempeñu ida-ne’ebé maka’as liu iha eventu anuál ne’e.
STICK halibur estudante sira, profesór sira, peskizadór sira no inovadór foinsa’e sira husi mundu tomak hodi aprezenta peskiza sientífika no projetu inovasaun sira hodi promove hanoin krítiku, kreatividade, komunikasaun sientífika no kolaborasaun internasionál.
Jornalista : Alexandra da Costa
Editór : Cancio Ximenes
