DILI, 22 Jullu 2026 (TATOLI)–Tribunál Judisiál Primeira Instánsia Dili (TJPID), Kuarta ne’e, liuhusi Juíz Rosito Guterres, hasai despaisu ikus ba kazu scam call centre iha Kuluhun, hodi deside aplika medida kauzaun ba arguidu na’in-19.
Polísia Sientífika Investigasaun Kriminál (PCIC, sigla portugés) asegura no detein arguidu sira iha Sesta (17/07) foin lalais ne’e.
Nune’e, Ministériu Públiku (MP) ne’ebé reprezenta husi Prokuradór Rafael Gusmão promove arguidu sira ho krime jogu ilísitu previstu iha artigu 322, asosiasaun kriminoza previstu iha artigu 188, brankamentu kapitál previstu iha artigu 313, no burla informátika previstu iha artigu 268 husi Kódigu Penál Timor-Leste.
Notísia relevante : MP propoin aplika prizaun preventiva ba arguidu na’in-ida ba kazu scam iha Kuluhun
Hafoin rona tiha parte hotu, Tribunál aplika medida kausaun $4.000, nune’e arguidu sira iha obrigasaun selu osan kausaun (osan garantia) ba arguidu na’in-18, enkuantu arguidu ho inisiál JY aplika kausaun ho valór $5.000.
Bazeia ba Tribunál nia despaisu, autoriza aplika medida proibisaun auzénsia, Termu Identidade no Rezidénsia (TIR) no aprezentasaun períodika semana ida dala-rua.
Jornalista : Natalino Costa
Editora : Julia Chatarina
