DILI, 23 Jullu 2026 (TATOLI)-Institutu ba Defeza Direitu Labarik ka Instituto para a Defesa dos Direitos da Criança (INDDICA) prevee orsamentu hamutuk rihun $370-resin ba projetu konstrusaun edifísiu foun iha Kaikoli.
Prezidente Instituto para a Defesa dos Direitos da Criança (INDDICA), Dinorah Granadeiro, hateten antes ne’e sira prevee orsamentu ba projetu konstrusaun edifísiu foun hamutuk rihun $150, maibé bazeia ba dezeñu Planta no Kadernu Enkargu ka Bill of Quantity (BoQ) husi ADN mak prevee osan hamutuk rihun $370-resin.
“Ami prevee uluk orsamentu husi tinan 2026 nian ho montante rihun $150 hodi kontinua prosesu konstrusaun ba edifísiu nian no hein fali 2027 mak ami sei halo tan proposta hodi aumenta orsamentu atu kompleta projetu refere,” Prezidente INDDIVCA ne’e hateten ba Agência Tatoli iha nia kna’ar fatin, Kaikoli, ohin.
Kona-ba projetu konstrusaun ne’e, nia dehan, seidauk hahú tanba agora iha hela prosesu konkursu públiku iha aprovizionamentu.
“Ami loke ona prosesu konkursu públiku no halo sorumutu ho kompañia sira-ne’ebé mai submete dokumentu, entaun semana ida-ne’e nia laran kompañia sei submete sira-nia dokumentu. Antes fulan-Jullu ne’e ramata, ita bele iha ona kompañia manán-na’in, nune’e fulan-Setembru bele hahú prosesu konstrusaun ba edifísiu foun ne’e,” nia hateten.
Tanba, nia dehan, bainhira prosesu konstrusaun ida mak foin halo iha fulan ikus molok tama ba 2027 nian ne’e, signifika iha prosesu on going (la’o daudaun hela) entaun INDDICA tenke prevee fali orsamentu iha tinan 2027 hodi kompleta projetu ida.
Jornalista : Alexandra da Costa
Editór : Cancio Ximenes
