DILI, 23 Julu 2026 (TATOLI)-Primeiru-Ministru (PM), Xanana Gusmão, nomeia Jacinto Ribeiro Dias, nu’udar Prezidente Autoridade Munisipál (PAM) Aileu foun hodi substitui João Bosco dos Santos.
Tuir artigu 21 iha Dekretu-lei númeru 3/2016, loron 16 Marsu, estabelese Prezidente Autoridade Munisipál livremente nomeadu no ezonera husi Primeiru-Ministru, liuhusi proposta Ministru Administrasaun Estatál (MAE).
Konsidera Ministru Administrasaun Estatál, liuhusi karta númeru ref 183/M-MAE/VII/2026, 22 Jullu, propoin Jacinto Ribeiro Dias hodi okupa kargu PAM Aileu.
Konsidera adekuasaun perfíl pesoál no profisionál ba kandidatu ne’ebé hato’o husi MAE ba tipu no ezijénsia kargu ne’e no funsaun dezempeña no objetivu governamentál definidu ba autoridade munisipál.
Ho nune’e, Primeiru-Ministru deside ezonera ho efeitu imediatu, tuir termu númeru 1 artigu 21 Dekretu-lei númeru 3/2016, loron 16 Marsu, ho redasaun Dekretu-lei númeru 34/2026, loron 15 Outubru, ba João Bosco dos Santos husi kargu Prezidente Autoridade Munisípiu Aileu.
“No nomeia efeitu imediatu Jacinto Ribeiro Dias hodi dezempeña kargu Prezidente Autoridade Munisípiu Aileu, konta husi data respetiva tomada pose, tuir termu legál”, refere komunikadu ne’ebé Tatoli asesu husi Jornál Repúblika, ohin.
Instrui ba MAE atu organiza serimónia pose no fó koñesimentu prezente despaxu ba Komisaun Funsaun Públika, hodi kumprimentu formalidade legál no regulamentu sira.
Ordena publikasaun prezente despaxu iha série 2 Jornál Repúblika, loron 22 Jullu 2026.\
Notísia relevante: PM Xanana suspende PAM Aileu no hatama hikas vítima AMA ba servisu
Jornalista: Nelson de Sousa
Editora: Maria Auxiliadora
