BOBONARU, 22 Jullu 2026 (TATOLI) – Reabilitasaun estrada liuhusi Programa Nasionál Dezenvolvimentu Suku (PNDS) 2026 iha Nunura, iha aldeia Manu-Aman, suku Tapo-Memo, postu administrativu Maliana, munisípiu Bobonaru, sai símbolu esperansa ba komunidade, tanba projetu ne’e hadi’a asesu transporte no fasilidade movimentu ema no rezultadu agríkola ne’ebé durante tinan barak hasoru difikuldade.
Komunidade Manu-Aman, Manuel Soares, hatete estrada foun ne’e halo komunidade sente kontente. Antes projetu ne’e implementa, durante tempu udan karreta no motorizada labele tama bá aldeia, nune’e komunidade tenke atravesa tahu hodi lori ai-han no produtu agríkola bá merkadu.
“To’o iha 2026, estrada foun tama ami-nia bairu, ami kontente. Durante ne’e ami sente la di’ak, tanba karreta ba-mai la di’ak, kalan la’o bá-mai mós tahu, to’o tempu silu no lalin batar mós liu husi tahu laran de’it. Ami senti di’ak tanba laiha ona tahu”, nia dehan ba jornalista sira, ohin.
Notísia relevante: Komunidade husu MOP halo manutensaun ba estrada Balibó-Nunura
Delegadu Aldeia Manu-Aman, Moises José dos Reis, dehan PNDS foin implementa projetu infraestrutura iha aldeia ne;e iha tinan 2026, no komunidade sente ona benefísiu husi projetu investimentu ne’e.
Tuir nia, durante tinan sira liubá komunidade rasik no iha empreza balun de’it mak halo ateru simples atu hadi’a dalan ne’e, maibé agora PNDS reabilita estrada ne’ebé di’ak liu no bele aumenta asesibilidade ba komunidade.
“Komunidade iha ne’e sente kontente maski dezenvolvimentu la’o neneik, maibé beibeik tanba Estadu mós hanoin atu hadi’a dezenvolvimentu iha aldeia ne’e uitoan-uitoan povu senteona”, nia salienta.
Moises hatutan katak serbisu konstrusaun hahú iha 15 Juñu 2026 no to’o agora konsege ramata ona metru 250 husi alvu totál metru 500.
“Serbisu la’o normál, laiha impedimentu signifikativu no komunidade koopera ho di’ak liu hodi fó asesu ba rai durante implementasaun obra”, dehan.
Nia akrexenta katak populasaun sira fiar estrada ne’e sei fasilita movimentu ema no sasán, nomós apoia atividade ekonómika no kontribui ba adezenvolvimentu aldeia iha futuru.
Projetu reabilitasaun estrada ne’e gasta verba hamutuk $33.092,06 no ne’ebé benifisia ba uma-kain kuaze 200 iha Aldeia Manu-Aman.
Notísia relevante: Komunidade lamenta ho projetu konstrusaun muru ponte Nunura ne’ebé la’o atraza
Jornalista: Sergio da Cruz
Editora: Maria Auxiliadora
