BOBONARU, 23 Jullu 2026 (TATOLI) – Ministériu Agrikultura, Pekuária, Peska no Floresta (MAPPF) disponibiliza tratór ki’ik haat ba agrikultór sira iha aldeia Rai-Luli, suku Kowa, postu administrativu Balibo, munisípiu Bobonaru, hodi hasa’e produtividade agríkola no reativa natar ne’ebé abandona durante tinan barak tanba falta bee.
Ministru Agrikultura, Pekuária, Peska no Floresta, Marcos da Cruz, dehan overnu fó apoia tratór no hadi’ak irrigasaun tanba identifika katak Rai-Luli iha potensia ba setór agrikultura ho nia rai luan no bokur.
“Iha semana hirak liu, ami mai haree katak rai luan ida-ne’e durante tinan barak abandona. Ami haree mós iha mota-oan rua no agora eskavadór ke’e ona bee dalan. Aban eskavadór sei kontinua serbisu atu aumenta mota ki’ik ida hodi fornese bee ba natar sira”, ministru dehan ba jornalista sira hafoin entrega tratór ba agrikultór sira.
Governante ne’e hateten katak aleinde tratór ki’ik haat ne’ebé entrega ona, Governu sei mobiliza tan tratór boot rua, mákina kuda hare rua no ko’a hare ida iha semana oin hodi apoia komunidade habelar tan área to’os no natar.
Ministru husu ba xefe aldeia sira atu jere tratór sira ho transparénsia no fahe ba agrikultór hotu atu benefísiu ne’e la ba ema ida de’it.
“Ohin ha’u dehan imi komesa ho ida-ne’e, buat balu ne’ebé seidauk barak, maibe imi presiza apoia tan. Ami mai ne’e hanoin hakarak iha fronteira ne’e ema labele hamlaha, ne’e mak agora ita book iha agrikultura”, nia dehan.
Aleinde apoiu ba setór agrikultura, MAPPF mós kontinua fó asisténsia ba pekuária hanesan edukasaun kona-ba saúde animál, kampaña prevensaun moras raiva, instalasaun brinkus ba karau no dezenvolvimentu peska liuhusi konstrusaun tanke ba haki’ak ikan. Iha setór floresta, insentiva komunidade atu kontinua kuda ai hodi hadi’a ambiente sai buras no matak.
Governu mós promete nafatin fó apoiu kombustivel gratuitu ba tratór, fini no asisténsia téknika, maibé husu komunidade atu partisipa ativamente hodi utiliza ekipamentu ne’ebé disponivel atu hasa’e produsaun agríkola.
Notísia relevante: Rai ektare 1.010 iha Bobonaru preparadu ba kuda hare époka dahuluk
Marcos da Cruz esplika katak objetivu prinsipal husi intervensaun ne’e mak atu asegura komunidade iha área fronteira bele iha segransa ba ai-han no hadi’a sira-nia moris.
“Ita lakohi sira hakat fali bá sosa hahán iha sorin [parte Indonézia]. Governu hakarak kria kondisaun ba aáea fronteira, nune’e ita-nia ema iha kondisaun ba ai-han, ita mai buka ajuda sira para iha kondisaun atu halo serbisu iha natar no to’os, para sira labele hamlaha”, katak.
Komunidade Kowa, Agostinho da Cruz, agradese ba apoiu husi Governu tanba konsidera bele hamenus kustu produsaun agríkola.
“Durante ne’e ami uza tratór privadu no selu to’o $45 ba ektare ida, ne’ebé todan ba agrikultór sira ne’ebé menus kapasidade”, dehan.
Biban ne’e komunidade Rai-Luli, Joanico Cruz Maia, hateten katak populasaun iha vontade boot atu halo natar, maibé durante tinan sanulu liubá abandona tanba falta bee.
Nia rekomenda ba governu atu konstrui mós chek dam ida tanba bee-matan iha área aas, atu bele asegura hodi fornese bee ba natar sira durante tempu bailoro no apoia mós mákina agrikultora hodi ajuda sira hasa’e produsaun agríkola iha área fronteira.
Totál área agrikultura iha fronteira Rai-Luli hamutuk ektare 62.
Notísia relevante: Drone agrikultura marka etapa foun ba modernizasaun setór agríkola iha Timor-Leste
Jornalista: Sergio da Cruz
Editora: Maria Auxiliadora
