DILI, 23 Jullu 2026 (TATOLI)—Tribunál Judisiál Primera Instánsia Dili (TJPID), Kinta ne’e, liuhusi despaisu ba prosesu primeiru interrogatóriu deside aplika medida aprezentasaun períodika ba arguidu ho inisiál JMdS.
Arguidu hanesan funsionáriu públiku iha ministériu balun no arguidu submete mai iha Tribunál husi parte Ministériu Públiku (MP), promove ho krime pekulatu de uzu tanba suspeitadu uza kupon Governu hodi ba ense mina ba karreta privadu.
Iha despaisu Tribunál, liuhusi Juíz Estajiáriu Rozito Guterres deside aplika medida aprezentasaun períodika ba arguidu atu aprezenta-an semana ida dala-ida iha loron Segunda, iha Eskuadra Polísia besik.
Notísia relevante : CAC detein kargu xefia ida uza kupon Estadu ense mina ba karreta privadu
Tribunál aplika medida referidu ba arguidu hodi asegura iha prosesu investigasaun ne’ebé sei la’o hela.
Rekorda fali katak, iha MP nia alegasaun solisita ba Tribunál atu aplika medida Termu Indentidade no Rezidénsia (TIR) no medida aprezentasaun períodika ba arguidu hodi hein prosesu investigasaun.
Aleinde husi parte defeza nian, aseita ho alegasaun husi MP, prosesu ne’e prezide husi Juíz Rozito Guterres, MP reprezenta husi Prokuradór Rafael Gusmão, arguidu hetan asisténsia legál husi Defensór Públiku Marcal Mascarinhas.
Jornalista : Natalino Costa
Editora : Julia Chatarina
