DILI, 23 Jullu 2026 (TATOLI)–Tribunál Judisiál Primera Instánsia Dili (TJPID), Kinta ne’e, liuhusi leitura akordaun ba kazu abuzu sexuál ba menór, deside aplika pena prizaun tinan-hitu ba arguidu ho inisiál A.
Juíz prosesu deklara katak, antes ne’e iha julgamentu arguidu konfesa ba faktu ne’ebé konsta iha akuzasaun Ministériu Públiku (MP) nian katak, arguidu prátika duni krime abuzu sexuál hasoru lezada ida-ne’ebé hela iha territóriu Timor -Leste.
Tribunál Kolektivu konsidera katak, arguidu konfesa ba faktu ne’ebé iha. Tanba ne’e, Tribunál Koletivu laiha dúvida, mantein ho akuzasaun ne’ebé MP prodús.
Notísia relevante : Inspetór Jerál ME halo ona investigasaun ba manorin halo abuzu sexuál hasoru estudante
Tanba ne’e, Kolektivu husi Tribunál Judisiál Primeira Instánsia Dili (TJPID) julga provadu ba deklarasaun ne’ebé arguidu hato’o perante julgamentu nia laran. Ikus mai Kolektivu konklui hodi deside aplika pena prizaun tinan-hitu ba arguidu.
Hafoin Juíz prosesu lee sai tiha leitura akordaun, esplika ba arguidu, bainhira la konkorda ho desizaun TJPID nian, bele liuhusi arguidu nia defeza, atu halo rekursu hodi rekorre ba Tribunál Rekursu tuir prazu loron-30 nia laran, sura husi loron ne’ebé simu notifikasaun husi TJPID.
Nune’e, arguidu oras ne’e daudaun iha hela prizaun preventiva ba prosesu seluk, tanba ne’e Tribunál husu atu arguidu atu kontinua asegura iha prizaun to’o prosesu ne’e tama iha Tránzitu Injulgadu.
Hafoin desizaun tun, Guarda Prizionál sira kontinua lori hikas arguidu ba prizaun.
Leitura akordaun ne’e, lee sai husi Juíz José Escurial, MP reprezenta husi Prokuradór Bartolomeo de Araújo, arguidu hetan asisténsia husi Advogadu Privadu Rui.
Jornalista : Natalino Costa
Editora : Julia Chatarina
