Jurista Pedro Camões konsidera desizaun KSMJ tenta imposibilita Juíz iha TR
DILI, 24 Jullu 2026 (TATOLI)–Jurista José Pedro Camões konsidera desizaun Konsellu Superiór Majistratura Judisiária (KSMJ) tenta atu imposibilita Juíz sira iha Tribunál Rekursu (TR) hodi labele konkorre iha vaga Rekrutamentu Juíz Supremu Tribunál Justisa.
Tuir nia juíz na’in-haat hanesan Duarte Tilman, Jacinta Correia, Maria Natercia Gusmão no Deolindo dos Santos nu’udar Juíz karreira ne’ebé okupa klase dahuluk no sira ne’e poténsia ba Juíz sira ne’ebé atu tuur iha Supremu Tribunál Justisa, maibé ho desizaun KSMJ ne’ebé foin daudaun hodi fó suspensaun ne’e tenta taka dalan ka imposibilita Juíz sira bele konkorre iha vaga STJ.
“Konsellu Superiór Majistratura Timor- Leste tenta imposibilita Juíz atu lakon diretu atu konkorre ba konkursu ne’ebé la’o hela, hanesan Komisáriu, lamenta ho meius ne’ebe iha, husu nafatin majistradu ne’ebé iha aplika nafatin ba vaga ne’e, nune’e mós husu kada sira atu halo auto defesa tuir prosedimentu no leis ne’ebé iha,” José Pedro Camões hato’o ba Ajénsia TATOLI iha Tribunál Judisiál Primeira Instánsia Dili, Sesta ne’e.
Notísia relevante : Komisaun A husu KSMJ garante funsionamentu TR relasiona ho juis na’in haat ne’ebé hetan prosesu disiplinár
Nia husu ba KSMJ atu mantein ba prinsípiu lei presume de inosente atu autoriza Juíz sira iha TR kontinua konkorre ba vaga ne’e inklui mós Juíz sira iha Tribunál Rekursu mós nune’e mantein ba prinsípiu ida-ne’e hodi kontinua aplika ba vaga.
“Husu atu majistradu ne’ebé suspendidu atu kontinua aplika ba konkursu ne’ebé atu besik ramata. Komisáriu husu atu kada sira uza direitu atu halo defeza ba sira-nia an. Tanba sansaun disiplinar ne’e la’ós últimu desizaun ida,” nia katak.
Jornalista : Natalino Costa
Editora : Julia Chatarina
