Sidadaun na’in-rua hatama pedidu providénsia kautelár hasoru Jenerál Falur Rate Laek
DILI, 24 Jullu 2026 (TATOLI)–Sidadaun na’in-rua hato’o pedidu providénsia kautelár ba Tribunál Judisiál Primeira Instánsia Dili (TJPID) hasoru Xefe Estadu Maiór Jenerál Forsa Armada (XEMGFA), Tenente Jenerál Domingos Raul Falur Rate, liga ho kompra no venda rai ida iha Hera, Postu Administrativu Kristu Rei, Munisípiu Dili.
Nune’e, Tribunál komunika hodi Jenerál Falur bele hato’o kontestasaun iha prazu loron-10 nia laran.
Iha Sesta (24/07), Celestinho Guterres nu’udar Mandatáriu husi Tenente Jenerál Falur, mai ho ekipa ida husi Seksaun Justisa ho Relasaun Públika, Kuartél Jerál FALINTIL-Forsa Defeza Timor-Leste (F-FDTL), hodi hato’o kontestasaun.
“Tuir loloos Tenente Jenerál ema inosente ida-ne’ebé la hatene buat ida, tanba nia la’ós parte husi rai ne’e, la halo kompra no venda ruma kona-ba rai ne’e, ema seluk tiha maka halo kompra no venda. Ho ida-ne’e Mandatáriu hatama kontestasaun ida ba Tribunál,” Celestinho Guterres hateten ba Jornalista sira iha TJPID, Kolmera, Sesta ne’e.
Notísia relevante : TDD julga providénsia kautelár ba rai konstrusaun edifísiu PNTL
Sidadaun na’in-rua liuhusi nia Advogadu, hatama prosesu sivíl kontra Tenente Falur Rate Laek.
“Tanba ne’e, ohin hanesan loron ikus ba prazu ne’ebé iha hodi hatama kontestasaun,” nia akresenta.
Celestinho Guterres dehan, hanesan Mandatáriu, nia parte halo kontestasaun kona-ba faktu ne’ebé iha hodi lori mai iha Tribunál hodi rejistu iha kontestasaun katak Tenente Jenerál inosente, nia la hatene kona-ba kazu ne’e, nia mós la hola parte iha rai ne’e, la’ós nia maka rai-na’in,” nia katak.
Hodi hatutan: “Nia (Jenerál) laiha relasaun ho rai ne’ebé disputa daudaun. Rai ne’e iha uluk tiha ona desizaun ida ne’ebé tránzitu ein julgadu, momentu ne’ebá laiha ema ida maka halo rekursu, laiha ema ida maka halo reklamasaun.”
Aleinde ne’e, na’in ba rai ne’e iha Terras Propriedade no Diresaun Terras no Propriedade halo levantamentu no sukat tiha ona rai, nune’e hein atu distribui sertifikadu.
“Maibé ema seluk ida la hatene halo kompra no venda ba rai ne’e husi kotuk, mosu mai hatama fali prosesu providénsia kautelár hasoru Tenente katak rai ne’e Jenerál mós envolve hotu. Tuir faktus loloos, rai ne’e nia na’in halai tiha ona bá Indonézia, nia fó tiha poder ba nia oan na’in-rua, no nia oan sira fó tutan podér ba nia tiun ida. Sira reklama rai ne’e kontra señora ida foin lalais mate ona, nomós ema balun tan maibé mai to’o iha Tribunál absolve reu sira ne’e. Desizaun ne’e tun iha loron 26 Fevereiru 2021,” Mandatáriu, haktuir.
Bainhira desizaun ne’e tun laiha ema ida mak halo rekursu, reklamasaun no intervensaun ruma. Prosesu ne’e la’o husi tinan 2021 to’o 2025 laiha ona reklamasaun, sira hetan ona títulu na’in ba rai, halo levantamentu ba Terras no Propriedade rejista hodi hetan sertifikadu, no sei iha Terras no Propriedade nia kompeténsia.
“Ikus mai, iha ema balun mai hatama fali prosesu providénsia kautelár hasoru Tenente Falur Rate Laek, maibé nia la halo kompra no venda iha ne’ebá, nia oan feto maka hola rai liuhusi sé ida. Rai ne’ebé sira reklama ne’e petak rua, no rai ne’ebé desizaun sai tiha ona maka parte sira reklama ne’e,” Celestinho Guterres, esplika.
Jornalista : Natalino Costa
Editora : Julia Chatarina
