Tribunál aplika prizaun preventiva ba arguidu na’in-11 ne’ebé Polísia detein iha Hera
DILI, 24 Jullu 2026 (TATOLI)–Tribunál Judisiál Primeira Instánsia Dili (TJPID), Sesta ne’e, liuhusi despaixu Juiza Ana Paula Fonseca, aplika prizaun preventiva ba arguidu na’in-11 ne’ebé Diresaun Servisu Investigasaun Kriminál (DSIK) asegura no detein iha área Hera Mota Kiik, Aldeia Halodilar, Suku Hera, Postu Administrativu Kristu Rei iha loron Kuarta (22/07).
Iha interrogatóriu dahuluk ne’e, Ministériu Públiku (MP) promove krime haat ba arguidu na’in-11, krime burla informátika, brankamentu Kapitál no asosiasaun kriminozu.
Durante interrogatóriu dahuluk ba prosesu ne’e, MP reprezenta husi Pedro Batista no Rafael Gusmão solisita ba Tribunál medida proibisaun auzénsia no kausaun $5.000.
Defeza arguidu sira João Pavão Serra, konsidera konsidera medida proibisaun auzénsia ne’e nia la aseita tanba evidénsia laiha, tanba la nesesáriu atu aplika medida referida no husu Tribunál atu aplika ba nia arguidu sira medida Termu Identidade no Rezidénsia (TIR). Enkuantu ba kausaun nian Defeza husu atu Tribunál aplika ba nia kliente kada ema $1.000.
Notísia relevante : Ekipa konjuta desmantela scam call center iha Hera, asegura sidadaun estranjeiru na’in-11
Hafoin rona tiha parte hotu, Tribunál hasai despaixu hodi aplika prizaun preventiva ba arguidu na’in-11.
Husi despaixu Tribunál nian ne’e, fundamenta katak iha indísiu katak arguidu sira halo prátika duni krime ne’ebé mak MP promove ba sira.
Tribunál mós iha nia despaixu katak fatin ne’e e mak arguidu sira uza hodi hala’o scam call center ne’e dook. Tanba ne’e, arguidu sira bele subar-an hodi kontinua halo atividade referidu.
Nune’e, ho sirkustánsia sira ne’e, Tribunál laiha dúvida atu aplika prizaun preventiva ba sira. Maibé husi parte Defeza arguidu sira la aseita ho despaixu Tribunál nian ne’e no sei halo rekursu iha prazu loron-15 nia laran hodi kontesta despaixu ne’e.
Tuir observsaun ne’ebé Ajénsia TATOLI asesu hafoin despaixu Tribunál nia ba arguidu sira, Polísia ezekuta despaixu Tribunál hodi lori arguidu sira ne’e ba estabelesimentu Prizionál Bekora.
Arguidu sira tanis iha sala julgamentu laran no sa’e ba karreta hodi la’o ba prizaun Bekora.
Jornalista : Natalino Costa
Editora : Julia Chatarina
