DILI, 24 Jullu 2026 (TATOLI)–Ekipa selesaun nasionál Vietname halakon selesaun nasionál Timor-Leste 7-0 iha jogu iha ASEAN Hyundai Cup 2026 iha jogu primeiru faze grupu A.
Notísia Relevante: TL preparadu hala’o jogu dahuluk kontra Vietname iha Hyundai Cup 2026
Jogu ne’e hala’o iha kinta kalan tuku 10h30 oras Timor-Leste nian no jogu referidu realiza iha Tailandia. Iha jogu ne’e Vietname domina tomak husi minutu dahuluk to’o árbitu huu ba minutu ikus jogu ne’e. Golu dahuluk mai husi Do Hoang Hen iha minutu hitu (7). Hafoin ne’e Nguyen Dinh Bac aumenta vantajen iha minutu 31.
Besik intervalu, Vietname kontinua presiona. Nguyen Dinh Bac marka tan nia golu daruak iha minutu 42, tuir kedas ho golu husi Do Hoang Hen iha minutu 41 no Nguyen Xuan Son iha minutu 45+1. Hafoin intervalu Vietname la tun ritmu. Nguyen Dinh Bac kompleta nia hat-trick iha minutu 65, no golu ikus ba jogu ne’e marka husi Nguyen Quang Hai iha minutu 79.
Ho rezultadu ne’e, Vietname iha pozisaun aas iha Grupu A ho pontu 3, enkuantu Timor-Leste presiza fila fali ba treinu hodi prepara ba jogu tuirmai.
Maske rezultadu la di’ak, ekipa Timor-Leste tenke nafatin foka ba jogu sira oin mai iha torneiu ASEAN nian ne’e. Torneiu Hyundai Cup 2026 sei sai esperiénsia boot ba jogador foin-sa’e sira hodi hasa’e sira nia nivel kompetisaun iha rejiaun.
Jornalista : Hortêncio Sanchez
Editór : Cancio Ximenes
