Empreza responsável hahú implementa projetu eletrifikasaun ba uma-kain 99 iha Soilesu
BOBONARU, 25 Jullu 2026 (TATOLI)–Empreza Fraxim Efran Unipesoál Lda Joinventure ho Com Maferdi Unipesoál Lda hahú implementa projetu eletrifikasaun nasionál estensaun liña média no baixa, postu transformadór baixada ba totál uma-kain 99, iha Aldeia Ai-aras no Soilesu, Suku Soilesu, Postu Administrativu Bobonaru, Munisípiu Bobonaru.
Totál orsamentu ne’ebé utiliza hodi ezekuta obra ne’e hamutuk $157.618,45 ho númeru kontratu 045/WK/EDTL,EP-2026.
Notísia Relevante: EDTL Bobonaru planeia instala enerjía eletridsidade iha Raifun-Lour-Kolimau
“Horisehik empreza fahe ona materiál ba traballadór sira, ohin hahú serbisu kee ai-rin iha Aibou, Sibilaun, Suku Soilesu,” Xefe Suku Soilesu, Marito Victor da Costa, informa ba Ajénsia TATOLI iha Bobonaru, Sábadu ne’e.
Líder komunitária ne’e dehan, komunidade sei fó apoia no kolabora ho empreza implementadór nune’e projetu ne’e bele finaliza tuir tempu kontratu fulan-ualu.
“Iha tinan 2012 liuhusi projetu Óleu Pezadu, Governu hahú instala eletrisidade tama territóriu Timor-Leste, ne’ebé komunidade iha Suku Soilesu asesu kuaze 20% de’it, enkuantu 80% mak seidauk asesu, ne’ebé ami-nia esperansa katak povu ne’ebé halerik ba eletrisidade iha finadu bele naroman ona, ami kontente tanba ami mós hetan dezenvolvimentu,” Marito tenik.
Notísia Relevante: EDTL Bobonaru planeia instala enerjía eletridsidade iha Raifun-Lour-Kolimau
Iha sorin seluk, Xefe aldeia Ai-Aras, Beatris dos Santos, kontente no konsidera ho implementasaun obra ne’e bele hakonu povu nia esperansa ba ukun-an.
“Tinan 20-resin dezde ukun-an ami-nia povu hela iha nakukun-laran, ohin loron Governu lori ahi mai ona, la kleur tan ami sei sente hotu naroman eletrisidade, ida-ne’e di’ak tebes kalan mós ami bele halo atividade saida de’it, ami-nia oan sira bele estuda mós ho di’ak,” nia katak.
Total populasaun iha Aldeia Ai-Aras hamutuk 1.661 husi uma-kain 357, kompostu husi 856 feto no mane 805.
Jornalista : Sergio da Cruz
Editora : Julia Chatarina
