EDTL Bobonaru planeia instala enerjía eletridsidade iha Raifun-Lour-Kolimau
BOBONARU, 10 Abríl 2025 (TATOLI)—Eletrisidade Timor-Leste, Empreza Públika (EDTL, E.P) plañeia iha tinan ne’e sei instala enerjía eletrisidade ba aldeia Raifun-Foho suku Raifun, postu administrativu Maliana no aldeia Galitaz ho Olo-Olo inklui aldeia Beamuas ho Lodasi, suku Kolimau, postu administrativu Bobonaru, munisípiu Bobonaru.
Koordenador EDTL, E.P munisípiu Bobonaru, Mario de Jesús,hateten aldeia rua iha suku Lour tama ona planu no sei implementa liuhusi Projetu Eletrifikasaun Komunitária (PEK), enkuantu aldeia Raifun-Foho no aldeia rúa seluk iha suku Kolimau implementa liuhusi Projetu Eletrifikasaun Nasionál (PEN) tanba distánsia dook husi liña jerál.
Notísia Relevante: Tempu badak, EDTL sei implementa PEK ba aldeia haat iha Bobonaru
“Ita esforsu tinan ida-ne’e komunidade hotu hakarak ka lakohi tenke asesu hotu eletrisidade,” nia informa ba jornalista sira, iha kna’ar fatin, kuarta ne’e.
Sorin seluk, Xefe suku Kolimau, Teotonio de Carvalho Marqués, husu ba EDTL, E.P atu asesu prosesu tanba komunidade sira halerik durante tinan barak ona.
“Ami husu ba IX Governu tau-matan netik mai ami, tanba ami-nia komunidade Beamoas lubuk ida, aldeia Lodasi mós lubuk ida maibé ami fiar katak sedu ou tarde sei realiza,” nia dehan.
Enkuantu aldeia hirak ne’ebé daudaun ne’e iha hela faze implementasaun projetu mak hanesan aldeia Purugua, suku Ilat-laun, aldeia Odelgomo, Mazop, suku Ai-Asa no aldeia Leber-Taz, Mabelis, inklui aldeia neen iha postu administrativu Loloto’e hansan Silagolo, Dilai, Anon Guda-Taz, Tepa no Hol-lak.
Aleinde ne’ebé iha ona faze atu implementa mak aldeia Holbese ho totál uma-kain 32, aldeia Laho uma kain 29 inklui bairru ida iha aldeia Odelgomo ho totál uma kain 56.
Notísia Relevante: EDTL Bobonaru deside kansela hakotu liña eletrisidade ba suku Saburai-aldeia Atus
Jornalista : Sergio da Cruz
Editór : Cancio Ximenes
