PM Xanana lansa fatuk dahuluk ba estrada urbana no bee-moos iha Venilale
BAUKAU, 25 Jullu 2026 (TATOLI)–Primeiru-Ministru (PM), Kay Rala Xanana Gusmão, akompaña ho entidade relevante sira, halo lansamentu fatuk dahuluk ba projetu reabilitasaun estrada urbana no fornesimentu bee-moos iha Postu Administrativa Venilale, Munisípiu Baukau.
Iha ámbitu ne’e, PM Xanana hateten, atividade ohin loron atu kumpre ezijénsia ne’ebé ferik katuas sira hakarak tamba husi sira-nia terus mak ohin loron Timor-Leste hetan ukun-an.
“Tamba ne’e maka iha ukun-an nia laran joven sira tenke hanoin uluk sira terus mak ita hetan ukun-an durante tinan-24 nia laran. Ohin ita ne’ebé sei moris tenke kontinua ezerse ita-nia serbisu no responsabilidade,” Xefe Governu hato’o iha atividade lansamentu iha Venilale, Sábadu ne’e.
Nia husu joven sira tenke estuda kompleta didi’ak tamba jerasaun foun mak sei kontinua funu.
“La’ós oho malu maibé atu dezenvolve rai ida-ne’e. Buat ne’ebé ita halo agora la’ós de’it ba ferik katuas sira maibe mós fini di’ak ba imi. Tinan 24 ona ita ukun-an ita haree ba povu terus tebes, moris a’at hela, moris laiha kondisaun. Tamba ne’e maka hotu-hotu ne’ebé ohin loron serbisu la’ós atu manán osan maibé atu serví ba rai ida-ne’e,” nia apela.
Notísia relevante : Governu estende kontratu projetu manutensaun estrada Baukau-Vikeke
Iha biban hanesan, Ministru Obra Públika, Samuel Marçal, hateten, atividade ne’e marka pasu importante ida ba dezenvolvimentu iha Munisípiu Baukau, liuliu iha Postu Administrativu Venilale.
“Estrada no bee-moos mak infraestrutura bázika importante no fundamentál atu aselera dezenvolvimentu iha setór hotu-hotu. Ita bele ko’alia kona-ba turizmu, edukasaun, saúde no setór seluk tan, maibé programa hotu-hotu sei la la’o di’ak se laiha eletrisidade. Tanba ne’e, ha’u hakarak fó parabéns ba komunidade tomak iha Venilale,” Ministru deklara.
Governante ne’e nota, ohin komunidade sente kontente no orgullu tanba estrada no bee-moos to’o ona ba sira-nia área.
Estrada urbana sei fó asesibilidade ba suku ualu no bee-moos sei fó asesu ba uma-kain 1.000.
“Ha’u husu ba komunidade hotu, liuliu família sira ne’ebé hela besik área serbisu, atu koopera ho empreza sira atubele ramata obra tuir tempu no tuir kontratu, tamba sei fó benefísiu ba komunidade sira, ba autoridade lokál sira tenke tau-matan no halo kontrola,” nia hato’o.
Ministru konsidera, responsabilidade ne’e la’ós de’it Governu nian, maibé komunidade mós tenke kontribui tau-matan no kuidadu ba patrimóniu públiku.
“Hafoin ohin ita halo lansamentu, semana tuir kompañia kontinua implementa ona tamba la liuhusi vistu Tribunál,” nia esplika.
Prezidente Autoridade Munisípiu (PAM) Baukau, Veneranda Eurico Lemos Martins, reprezenta komunidade iha postu Venilale, hato’o agradesimentu tamba hahú kedan iha Fulan-Fevereiru halo lansamentu estrada urbana iha Baukau to’o agora nafatin halo lansamentu estrada iha Venilale.
“Maski neneik maibé bebeik, tamba ne’e ita tenke hatudu ita-nia unidade no estabilidade,” PAM Baukau enkoraja.
PAM mós husu ba setór privadu sira atu labele hadau malu projetu, maibé tenke hamutuk no apoia malu atu garante nafatin dezenvolvimentu la’o ho di’ak.
“Ohin ita mós submete ona proposta balun ba Governu sentrál hodi haree, ita hein de’it, neneik ba neneik sei mosu esperansa ne’ebé labosok, tamba Timor iha munisípiu barak ne’ebé mak sei presiza Governu nia tulun,” PAM hatutan.
Projetu reabilitasaun estrada urbana iha Postu Venilale sei implementa husi kompañia Augusto Huhu Lda, no projetu fornesimentu bee-moos nian sei implementa husi kompañia HXF Huaxin Holding, Lda ho durasaun tempu tinan-ida, ho totál orsamentu $3.715.130,09.
Jornalista : Alexandra da Costa
Editora : Julia Chatarina
