PNTL detein suspeitu na’in-92 ba krime scam iha Dili laran
DILI, 27 Jullu 2026 (TATOLI)–Portavós Polísia Nasionál Timor-Leste (PNTL), Superintendente Xefe Polísia João Belo dos Reis, informa, iha loron-rua liubá, ekipa konjuta kompostu husi Forsa Armada, Servisu Migrasaun, no Diresaun Servisu Investigasaun Kriminál (DSIK) detein suspeitu na’in- 92 ba krime scam.
Ekipa konjunta ne’e iha loron Domingu (26/07) tuku 21:00 halo operasaun hodi desmantela rede scam call center, ne’ebé opera iha otél ida iha Areia Branka.
Operasaun ne’e rezulta husi parte intelijénsia nia koleta informasaun, ne’ebé hatudu katak iha duni prezensa husi grupu organizadu kompostu husi sidadaun estranjeiru, ne’ebé komete fraude dijitál, espesialmente romance scam, investment scam, no modalidade seluk tan ho meiu eletrónika, ne’ebé ho vítima iha rai-li’ur inklui timoroan iha rai-laran.
Ekipa ne’e konsege detein sidadaun estranjeiru hamutuk 30, kompostu husi Xina na’in-29 no Laos na’in-ida.
“Operasaun ne’e detein kedan sidadaun sira ne’e iha sela detensaun Eskuadra Dom Aleixo, hein primeiru interrogatóriu judisiária,” João Belo dos Reis hateten ba jornalista iha ninia knaar fatin, Kuartél Jenerál PNTL, Kaikoli, Tersa ne’e.
Notísia relevante : Tribunál aplika medida kausaun ba arguidu krime scam call center iha Kuluhun
Nune’e mós, iha loron Segunda (27/07) iha tuku 22:00, ekipa konjunta kompostu husi DSIK, Servisu Migrasaun, Servisu Informasaun, no Servisu Investigasaun Kriminál halo operasaun daruak hodi sobu rede scam iha área Kampung Baru – Komoro.
Operasaun ne’e akontese iha flagrante delitu, ho agente sira intervein iha momentu ne’ebé suspeitu sira halo atividade atu kontaktu vítima potensiál liuhusi plataforma dijital, uza téknika sosiál enjeñaria, phishing, no romance scam.
“Detein suspeitu na’in-62, hanesan sidadaun estranjeiru na’in-28 husi Indonézia, na’in-33 husi Xina no na’in-ida husi Índia,” nia informa.
Suspeitu sira ne’e daudaun detein ona iha sela detensaun Komandu Jerál PNTL durante oras 72 nia laran.
“Iha menus 48 oras, ami-nia forsa desmantela rede scam tolu ne’ebé opera iha kurasaun kapitál. Detensaun 92 sidadaun estranjeiru envolve iha fraude dijitál manda mensajen klaru katak Timor-Leste la’ós rai ne’ebé ema-nia ba kriminalidade organizadu. PNTL, iha konjuntu ho ami-nia parseiru institusionál, iha vijilánsia no atua ho firmeza kontra ema ne’ebé tenta uza ami-nia territóriu atu esplora sidadaun timoroan no estranjeiru,” Portavós PNTL, afirma.
João Belo hatutan: “Iha loron ikus ne’e, Forsa Seguransa no Defeza iha ita-nia rai demonstra ona, tanba dala-ida tan, sira-nia determinasaun atu proteje soberania nasionál, orden públika, no bem-estar sidadaun timoroan.”
Nia refere mós ba operasaun ne’ebé konsege halo apreensaun ba sigarru karton 2.583. “Kontrabandu sigaru la’ós de’it krime fiskál maibé sai hanesan atividade ne’ebé finansia rede krimi, korrompe instituisaun, prejudika saúde públika, no rai reseita Estadu ne’ebé bele investe iha edukasaun, saúde, no infraestrutura.”
Enkuantu, scam call center sai forma modernu no sofistikadu husi kriminalidade ne’ebé esplora konfiansa, esperansa, no dala barak vulnerabilidade ema nian. Aleinde ne’e, vitima husi fraude sira ne’e lakon sira-nia ekonomia, dignidade, no iha kazu balun sira-nia saúde mentál.
“PNTL la permite katak ita-nia rai sai hanesan plataforma ba atividade predatória sira ne’e. Ami hakarak manda mensajen klaru ba rede krime internasionál: Timor-Leste la’ós rai akollimentu ba krime organizadu. Ema ne’ebé tenta uza ami-nia territóriu, ami-nia tasi, ka ami-nia espasu dijitál ba atividade ilísita sei hetan resposta firme, koordenada, no implákavel husi ami-nia forsa seguransa,” Portavós PNTL, afirma.
Nia agradese ba Servisu Migrasaun nia serbisu hamutuk no agradese mós ba instituisaun parseiru informasaun, Autoridade Marrítima no Forsa Defeza, Autoridade Aduneiru ba serbisu di’ak koordenasaun no kooperasaun interinstitusionál.
“Ha’u apela ba sidadaun sira atu mantein vijilánsia, denúnsia atividade suspeitu liu Eskuadra Polísia ne’ebé iha Eskuadra besik no nunka transmite dadus pesoál, kódigu banku, ka osan ba ema la hatene liuhusi telefone ka internet. PNTL kontinua komprometidu ho nia misaun atu serví no proteje,” nia hato’o.
Jornalista : Natalino Costa
Editora : Julia Chatarina
