Portavós PNTL klarifika dezentendimentu entre DSIK no PCIC
DILI, 28 Jullu 2026 (TATOLI)–Portavós Polísia Nasionál Timor-Leste (PNTL), Superintendente Xefe Polísia João Belo dos Reis, klarifika dezentendimentu entre pesoál Diresaun Servisu Investigasaun Kriminál (DSIK) no Polísia Sientífika Investigasaun Kriminál (PCIC, sigla portugés).
Dezentendimentu mosu entre membru husi instituisaun rua iha Segunda (27/07) bainhira halo operasaun ba suspeitu sira iha krime scam call center iha Kampung Baru – Dili.
Bainhira ekipa DSIK tuun bá lokál akontesimentu atividade ilísitu hodi halo identifikasaun ba suspeitu na’in-62, iha tempu hanennsan iha mós pesoál PCIC ne’ebé halo mós serbisu hanesan ba suspeitu sira.
Nune’e, mosu diskusaun entre pesoál husi institusaun rua ne’e no ikus mai hakilar malu to’o mosu dezentendimentu tanba idaidak defende katak ezekuta serbisu bazeia ba kompeténsia instituisaun. Maibé to’o ikus mai Komandante Polísia ne’ebé mak lidera ekipa DSIK hakalma kedan situasaun ne’e.
“Operasaun primeiru normál, kuandu Estadu tau instituisaun rua ne’ebé mak halo nia serbisu hanesan, ne’e ha’u hanoin la presiza, ita tau instituisaun rua ho serbisu hanesan bele prejudika ba operasaun ne’ebé ita hala’o, mas ida-ne’e ita tenta minimiza konflitu sira tanba desizaun Estadu nian. Ita tenta minimiza konflitu sira ho maneira pasífika para rezolve operasaun ne’ebé mak ita hala’o,” Portavós PNTL, Superintendente Xefe Polísia João Belo dos Reis, informa ba Jornalista sira iha ninia knaar fatin, Komandu Jerál PNTL, Kaikoli, Kuarta ne’e.
Notísia relevante : PCIC asegura tan ema na’in-110 iha Bebonuk suspeitadu envolve prátika online scam
Tuir Lei Organizasaun Investigasaun Kriminál, númeru 9/2022 ne’ebé define kompeténsia DSIK – PNTL mak hanesan tuir mai :
Ofensa ba integridade fízika, ofensa ba integridade fízika simples (artigu 145), ofensa ba integridade fízika grave (artigu 146), agravasaun (artigu 147) (dedús katak ida-ne’e inklui tanba artigu 146), maus-tratus ba inkapáz (artigu 153), maus-tratus ba konjuje (artigu 154), maus tratus ba menór (artigu 155), (artigu 156) agravasaun tanba rezultadu, ameasa (artigu 157), koasaun (artigu 158), kousaun grave (artigu 159).
Enkuantu ba kompeténsia PCIC mak hanesan:
Ema mate omisídiu (artigu 138), omisídiu agravadu (artigu omísidiu neglijente (artigu 139 no 140), no ofensa.
Nune’e mós, sexuál sira; koasaun sexuál (artigu 177), violasaun (artigu 172, artigu 172) agravasaun (artigu 173) (inklui esplorasaun sexuál ba parte datoluk (artigu 174), abuzu sexuál ba menór (artigu 177), asaun sexuál ho ema adoleste (artigu 178), abuzu sexuál ba ema ne’ebé bele reziste (artigu 179).
Jornalista : Natalino Costa
Editora : Julia Chatarina
