Governu garante implementasaun ekitativu ba programa merenda eskolár iha eskola hotu
DÍLI, 29 Jullu 2026 (TATOLI) – Governu, liuhosi Ministériu Edukasaun (ME), hamutuk ho Ministériu Administrasaun Estatál (MAE) no Ministériu Saúde (MS), kontinua implementa Programa Merenda Eskolár ne’ebé justu ba eskola hotu iha Timor-Leste, tantu eskola públika no privada.
Xefe Departamentu Asaun Sosiál Eskolár no Merenda Eskolár, Belchior Maria Almeida Barros Guerra, hateten programa merenda eskolár ne’e garante estudante hotu hetan benefísiu hanesan, la haree ba tipu eskola.
“Programa Merenda Eskolár ne’ebé Governu implementa aplika ho justu ba eskola hotu. La iha diferensa iha implementasaun ba eskola públika, privada, katólika no seluk,” Belchior dehan ba jornalista sira iha Timor Plaza, Dili, ohin.
Maske nune’e, nia rekoñese katak eskola balun seidauk iha koñesimentu dia’k kona-ba oinsá jere no implementa programa ne’e ho di’ak. Tanba ne’e, Belchior dehan, Ministériu Edukasaun kontinua fó orientasaun no apoiu tékniku ba eskola sira.
Tuir Belchior, kada eskola iha ekipa ida ne’ebé kompostu husi nutrisionista, koordenadór no tein-na’in sira atu asegura programa merenda eskolár lao tuir padraun ne’ebé determina ona.
Koordenadór sira responsabiliza atu organiza implementasaun programa, koordena sosa ai-han no garante preparasaun ai-han ba estudante sira.
Iha fulan hirak liubá, Ministériu Edukasaun, hamutuk ho Ministériu Saúde, Ministériu Administrasaun Estatál no parseiru sira, hala’o formasaun ba koordenadór no tein-na’in sira iha Munisípiu Dili, inklui Hera no Metinaro. Formasaun durante loron tolu ne’e fó orientasaun kona-ba preparasaun menu nutrítivu ne’ebé tenke implementa iha eskola sira.
“Ami distribui ona manual ba eskola hotu atu sai matadalan ba implementasaun programa. Manual ne’e rekomenda menu nutrítivu ba estudante sira kada loron. Hanesan ezemplu, iha segunda-feira menu inklui ai-fuan, no iha terça-feira hahán ho foremungu daan ka ai-han nutritivu seluk,” nia dehan.
Belchior enfátiza katak Governu kontinua hametin koordenasaun entre Ministériu Edukasaun, Ministériu Saúde, Ministériu Administrasaun Estatál no Ministériu Agrikultura hodi asegura disponibilidade ai-han no hadi’a implementasaun programa merenda eskolár iha nasaun tomak.
Nia ackresenta katak Ministériu Edukasaun mós rekomenda Ministériu Saúde atu kontinua fó apoiu liuhosi nutrisionista sira, tanba sira iha kompeténsia atu fó orientasaun kona-ba nutrisaun ne’ebé di’ak ba estudante sira.
“Ho kolaborasaun entre ministériu sira no parseiru hotu, ami espera programa merenda eskolár bele kontinua hadi’a saúde no garante nutrisaun di’ak ba estudante sira iha Timor-Leste,” nia konklui.
Jornalista: Camilio de Sousa
Editór: Filomeno Martins
