PNTL detein membru PCIC ho inisiál DdS
DILI, 29 Jullu 2026 (TATOLI)–Polísia Nasionál Timor-Leste (PNTL) liuhusi Komandu Munisípiu Dili, Kuarta ne’e, ezekuta mandadu Judisiál Primeira Instánsia Dili (TJPID) 0289/24 PCCIC, hodi autoriza Seksaun Investigasaun Kriminál Munisípiu Dili detein membru Polísia Sientífika Investigasaun Kriminál (PCIC, sigla portugés) ho inisiál DdS tanba suspetadu ba krime obstrusaun autoridade públika ne’ebé akontese iha tinan 2024.
Nune’e, ohin iha tuku 09:00 dadeer, ekipa husi Seksaun Investigasaun Kriminál Munisípiu Dili to’o iha edifísiu PCIC Kolmera hodi ezekuta mandadu referida.
Molok atu halo detensaun ba Dds, ekipa responsável aprezenta uluk mandadu ba membru PCIC ne’e, nune’e nia parte kolabora no sa’e bá karreta hodi lori ba Komandu Munisípiu Dili hodi detein iha sela detensaun durante oras 24, nu’udar detidu tuir mandadu Tribunál.
Notísia relevante : PCIC detein Xineza ida tanba tama iha lista mean INTERPOL
Krime obstrusaun autoridade públika rasik previstu no punidu iha artigu 251 husi Kódigu Penál Timor-Leste.
Iha Sesta (30/07) ne’e, AutoridadeSeguransa sei aprezenta hodi submete ba Primeiru Interrogatóriu dahuluk iha Tribunál Judisiál Primeira Instánsia Dili (TJPID).
Membru PCIC ho inisiál D mós suspeitadu envolve iha dezentendimentu entre membru Diresaun Servisu Investigasaun Kriminál (DSIK) no PCIC, bainhira ekipa halo operasaun ba atividade scam call center iha Kampung Baru-Dili, iha Segunda (27/07).
Ekipa DSIK ba lokál krime hodi halo identifikasaun ba suspeitu na’in-62 ba atividade scam call center, no iha tempu hanesan iha mós pesoál PCIC ne’ebé halo mós serbisu identifikasaun hanesan ba suspeitu sira.
Bainhira mosu diskusaun entre pesoál husi institusaun rua ne’e, ikus mai hakilar malu to’o mosu dezentendimentu tanba idaidak defende katak mai halo serbisu tuir kompeténsia ne’ebé lei define ona ba instituisaun. Maibé to’o ikus mai Komandante Polísia ne’ebé mak lidera ekipa DSIK hakalma kedan situasaun ne’e.
“Operasaun primeiru normál, kuandu Estadu tau instituisaun rua ne’ebé mak halo nia serbisu hanesan, ne’e ha’u hanoin la presiza, ita tau instituisaun rua ho serbisu hanesan bele prejudika ba operasaun ne’ebé ita hala’o, mas ida-ne’e ita tenta minimiza konflitu sira tanba desizaun Estadu nian. Ita tenta minimiza konflitu sira ho maneira pasífika para rezolve operasaun ne’ebé mak ita hala’o,” Portavós PNTL, Superintendente Xefe Polísia João Belo dos Reis, informa ba Jornalista sira iha ninia knaar fatin, Komandu Jerál PNTL, Kaikoli, Kuarta ne’e.
Tuir Lei Organizasaun Investigasaun Kriminál, númeru 9/2022 ne’ebé define kompeténsia DSIK – PNTL mak hanesan tuir mai :
Ofensa ba integridade fízika, ofensa ba integridade fízika simples (artigu 145), ofensa ba integridade fízika grave (artigu 146), agravasaun (artigu 147) (dedús katak ida-ne’e inklui tanba artigu 146), maus-tratus ba inkapáz (artigu 153), maus-tratus ba konjuje (artigu 154), maus tratus ba menór (artigu 155), (artigu 156) agravasaun tanba rezultadu, ameasa (artigu 157), koasaun (artigu 158), kousaun grave (artigu 159).
Enkuantu ba kompeténsia PCIC mak hanesan:
Ema mate omisídiu (artigu 138), omisídiu agravadu (artigu omísidiu neglijente (artigu 139 no 140), no ofensa.
Nune’e mós, sexuál sira; koasaun sexuál (artigu 177), violasaun (artigu 172, artigu 172) agravasaun (artigu 173) (inklui esplorasaun sexuál ba parte datoluk (artigu 174), abuzu sexuál ba menór (artigu 177), asaun sexuál ho ema adoleste (artigu 178), abuzu sexuál ba ema ne’ebé bele reziste (artigu 179).
Jornalista : Natalino Costa
Editora : Julia Chatarina
