Tribunál aplika aprezentasaun períodika ba arguidu hatama sigarru karton 2.583
DILI, 29 Jullu 2026 (TATOLI )–Tribunál Judisiál Primeira Instánsia Dili (TJPID), Kuarta ne’e, realiza prosesu interrogatóriu dahuluk ba arguidu na’in-neen ne’ebé hatama sigarru ilegál karton 2.583 iha Munisípiu Baukau, Segunda (27/07) ne’e.
Arguidu sira ne’e hamutuk na’in-hitu, kompostu husi na’in-lima hanesan sidadaun Myanmar no na’in-rua sidadaun Xina.
Ministeriu Públiku (MP) promove arguidu sira ho krime kontra-bandu no deskamiñu ne’ebé previstu iha Kódigu Penál Timor-Leste.
Iha alegasaun, MP husu ba Tribunál atu aplika medida koasaun prizaun preventiva ba arguidu na’in-hitu tanba arguidu sira suspeitadu uza ró ilegál hodi halo operasaun iha Timor-Leste.
Parte defeza husi arguidu sira la aseita no husu ba Tribunál atu aplika medida koasaun aprezentasaun períodika no proibisaun auzénsia ba arguidu na’in-neen, enkuantu arguidu na’in-ida ho inisiál CC atu aplika medida koasaun Termu Identidade Rezidénsia (TIR) tanba ninia detensaun ne’e ilegál tanba fora de fraglante delitu.
Notísia relevante: Ekipa konjunta halo apreensaun ba sigarru karton 2.583
Nune’e, hafoin rona tiha parte hotu, Tribunál liuhusi Juíz José Quitão deside aplika medida koasaun aprezentasaun períodika, proibisaun auzénsia no TIR ba sidadaun estranjeiru na’in-neen, enkuantu na’in-ida hetan medida koasaun TIR tanba fora husi flagrante delitu.
Enkuantu objetu apreendidu sira iha Tribunál nia despaixu hateten prosesu sei la’o no sei remete ba Tribunál Judisiál Primeira Instánsia Baukau. Tanba ne’e, kompeténsia kabe ba Tribunál Baukau tanba momentu hala’o apreensaun ba objetu sira ne’e iha área juridisaun ne’ebá.
Iha prosesu interrogatóriu dahuluk ne’e prezide husi Juíz Turnu José Quintão, MP reprezenta husi Prokuradór Matias Soares no arguidu na’in-hitu hetan asisténsia legál husi Advogadu Privadu Napoleão de Oliveira Carvalho.
Jornalista : Natalino Costa
Editora : Julia Chatarina
