Ekipa konjunta halo apreensaun ba sigarru karton 2.583
DILI, 28 Jullu 2026 (TATOLI)—Ekipa konjunta liuhusi operasaun hodi kombate krime transnasionál no soberania nasionál, hahú husi loron 26 to’o 27 Jullu konsege halo apreensaun ba sigarru karton 2.583.
Ekipa konjunta kompostu husi Polísia Nasionál Timor-Leste (PNTL), Diresaun Servisu Investigasaun Kriminál Nasionál, Servisu Migrasaun, Servisu Informasaun, Unidade Polísia Marítima (UPM), FALINTIL Forsa Defeza Timor-Leste (F-FDTL) husi Komponente Navál, Autoridade Marrítima Nasionál, Autoridade Aduaneira (Alfándega), Diresaun Nasionál Transporte Marrítima, nomós Ofisiál Justisa husi Ministériu Públiku.
“Iha semana barak, servisu intelijénsia no seguransa marrítima husi Forsa Defesa Timor-Leste no PNTL monitoriza movimentu husi embarkasaun karga suspeitu ne’ebé navega iha Tasi Timor. Informasaun ne’ebé koleta hatudu katak iha posibilidade transporte merkadoria ilísita, espesialmente sigarru kontrabandu, ne’ebé maihusi rede komérsiu ilegál estranjeiru sira ne’ebé buka atu infiltrasa merkadu timoroan iha área Baukau, Kosta Norte Timor-Leste, Ró Jarga ‘Famar Jaya Utama’ (bandeira Kamboja). Sigarru ilegál ka kontrabandu karton 2.583 mak ami halo apreensaun,” Portavós PNTL, Superintendente Xefe Polísia João Belo dos Reis, hato’o ba jornalista sira iha ninia knaar fatin, Tersa ne’e.
Notísia relevante : Ekipa konjunta halo apreensaun ba sigarru ilegál kaixa 50 iha Kasnafar
Sigarru ne’ebé Polísia halo apreensaun mak ho tipu Manchester, Marlboro Timor-Leste, Marlboro Mutin Indonézia, Dunhill 555 Gold Virginia Tobaku, Manchester Sapphire Blue, no Double Happiness.
Superintendente Polísia João Belo, informa, Polísia detein ona sidadaun estranjeiru hamutuk na’in-hitu, kompostu husi Myanmar na’in-lima no Xina na’in-rua.
“Sidadaun sira ne’e agora detein ona iha sela detensaun Eskuadra Dom Aleixo,” nia katak.
Jornalista : Natalino Costa
Editora : Julia Chatarina
