Tribunál aplika medida kausaun $3.000 ba kada arguidu suspeitadu atividade scam iha Metiaut
DILI, 29 Jullu 2026 (TATOLI )–Tribunál Judisiál Primeira Instánsia Dili (TJPID), Kuarta ne’e, hala’o interrogatóriu dahuluk ba arguidu na’in-30, ne’ebé Diresaun Servisu Investigasaun Kriminál (DSIK) asegura no detein iha loron Domingu (26/07) iha otél ida iha área Metiaut.
Ministériu Públiku (MP) iha interrogatóriu dahuluk ne’e promove arguidu sira ba krime haat mak hanesan krime jogu ilísitu, asosiasaun kriminoza, burla informátika no krime brankeamentu kapitál.
Iha alegasaun, MP reprezenta husi Prokuradór, Matias Soares husu ba Tribunál atu aplika medida kausaun ne’ebé mak antes ne’e Tribunál hatuun ona liuhusi despaisu ba arguidu sira seluk.
Notísia relevante: PNTL detein suspeitu na’in-92 ba krime scam iha Dili laran
Enkuantu, Defeza husi arguidu sira husu ba Tribunál atu fó liberdade ba nia kliente tanba la priense ba flagrante delitu.
Hafoin rona tiha parte hotu, Tribunál hasai despaisu hodi aplika medida kausaun $3.000 ba kada arguidu na’in-28, enkuantu arguidu rua seluk Tribunál aplika medida proibisaun auzénsia no medida koasaun Termu Identidade Rezidénsia (TIR).
Jornalista : Natalino Costa
Editora : Julia Chatarina
