Tribunál hatún despaisu liberta hikas detidu DdS husi sela detensaun
DILI, 29 Jullu 2026 (TATOLI)–Tribunál Judisiál Primeira Instánsia Dili (TJPD) liuhusi Juíza Ana Paula Fornseca deside liberta hikas detidu ho inisiál DdS, nu’udar membru Polísia Sientífika Investigasaun Kriminál (PCIC, sigla portugés).
Tribunál hasai mandadu hodi fó orden ba Polísia Nasionál Timor-Leste (PNTL) Komandu Munisípiu Dili seksaun Investigasaun Kriminál hodi halo detensaun ba DdS tanba inkomprimentu ba orden Tribunál nian, ne’ebé previstu iha artigu 90 no 256 husi Kódigu Prosesu Penál Timor-Leste.
Maibé hafoin detensaun, la to’o 24 oras, Tribunál hasai despaisu hodi liberta hikas DdS husi sela detensaun Komandu Munisípiu Dili, nune’e ohin DdS hatán ba kazu balun iha Tribunál.
Defeza husi DdS, Advogada Privada, Adelina Melo de Jesus, hateten, detensaun ne’e tanba nia kliente la kumpre ba regra peosesuál balun ne’ebé la’o hela iha Tribunál.
“Ida-ne’e relasiona ho kazu balun ne’ebé la’o hela iha Tribunál. Laiha ligasaun ho dezentendimentu foin daudaun,” Adelina hato’o ba jornalista sira iha Komandu Munisípiu Dili, Kaikoli, Kuarta ne’e.
Notísia relevante: PNTL detein membru PCIC ho inisiál DdS
Artigu 90 husi Kódigu Prosesu Penál deskreve katak;
Artigu 90.º
Falta iha aktu prosesu
1, Iha momentu ne’ebé aktu ida hahú, ema ne’ebé prezide fó justifikasaun ba falta no kondenasaun ba faltozo sira-ne’ebé la hetan justifikasaun, hamutuk ho sansaun prosesuál seluk ne’ebé lei espesiál konsagra, tuir lei prosesuál sivíl.
- Tenke fó hatene advogadu nia falta ba nia konstituinte no defensór públiku nia falta ba serbisu ne’ebé kaer disiplina ba defensór públiku sira.
- Ministériu Públiku nia falta tenke fó hatene ba nia superiór ierárkiku
- Iha situasaun sira-ne’ebé la tama iha nº 2 no 3, juíz bele fó orden atu halo detensaun ba faltozu, durante tempu ne’ebé presiza, hodi halo nia mai aktu prosesuál iha ne’ebé nia falta tiha ona injustifikadamente.
No artigu 256 hateten Arguidu nia falta
- Kuandu arguidu, notifikadu tuir lei, falta, audiénsia tenke adia molok hahú produsaun-de-prova.
- Kuandu la aprezenta justifikasaun iha loron-lima nia laran, arguidu tenke selu multa ne’ebé aplika ba nia tanba falta ne’e no Tribunál bele hasai mandadu detensaun atu halo nia mai iha data ne’ebé marka fali.
- Kuandu arguidu fó justifikasaun kona-ba nia falta, tenke notifika fali nia atu mai iha data foun ba julgamentu ne’e, ho avizu katak nia falta fali karik, julgamentu sei halo iha nia auzénsia, no nia defensór maka reprezenta nia iha julgamentu ne’e.
Jornalista : Natalino Costa
Editora : Julia Chatarina
