Família 28 iha Oekusi simu materiál rekuperasaun no fundu ‘mão-de-obra’ husi SEPS

OEKUSI, 30 Jullu 2026 (TATOLI) – Sekretáriu Estadu Protesaun Sívil (SEPS), kinta ohin, oferese materiál konstrusaun no rekuperasaun ba vítima dezastre naturál hamutuk uma-kain 28 ne’ebé mai husi suku 14 iha Rejiaun Administrativa Espesiál Oekusi Ambenu (RAEOA).

Sekretáriu Estadu Protesaun Sívil, Domingos Ramos Reis, hateten katak apoia ne’e fahe ba kategória tolu: aat totál uma-kain sia (9), aat natón uma-kain hitu (7), no aat kamán uma-kain 12.

Materiál konstrusaun hirak-ne’e komposta husi zinku, simente, besi-beton, pregu, besi-kamaan (baja ringan), balde, no sasán seluktan. Apoia ne’e kompleta mós ho kustu operasaun mão-de-obra nian ho montante $20,450.00 USD ba afetadu dezastre sira iha tinan-2025.

“Apoia ne’e tuir kbiit Governu nian, atu tulun inan-aman sira-ne’ebé hetan dezastre ahi han uma, anin sobu uma no dezastre seluktan, tanba ne’e Governu oferese materiál hirak-ne’e, ba ita-boot sira atu hadi’a fali uma hodi hela ho dignu no seguru hanesan ema seluk,” nia hateten iha kampu futeból Oébau, Oekusi, ohin.

Governante ne’e apela ba vítima sira atu utiliza didi’ak materiál hirak-ne’e, no labele fó empresta ba ema seluk ka fa’an tutan. Nune’e mós, nia enkoraza autoridade lokál sira atu kontinua rekolla dadús vítima dezastre naturál iha suku hodi relata ba Autoridade Protesaun Sívil munisípiu nian atu bele hetan apoia tan iha tinan 2027.

“Ha’u dezafia xefe suku sira, Ofisiál Polísia Suku (OPS) atu serbisu hamutuk ho komunidade sira ba rekolla dadús iha baze, no kontinua kontrola sasán sira-ne’ebé ohin oferese ona, ne’e Estadu nian, oferese ba família sira-ne’ebé sofre dezastre, tenki hadi’a fali uma, labele fa’an ka fó impresta, karik ida-ne’e akontese, presiza rejísta hodi entrega fali ba Estadu atu apoia tan ba ema seluk,” nia hateten.

Iha biban ne’e, Sekretáriu Estadu Protesaun Sívil hato’o mós sentimentu ksolok no agradesimentu ba parseiru dezenvolvimentu sira hanesan OXFAM Timor-Leste, WFP, no Cruz Vermelha Timor-Leste (CVTL), tanba konsege fasilita uluk ona apoia emerjénsia liliu food item (ai-han) no non-food item (sasán ne’ebé la’ós ai-han).

Prezidente Autoridade RAEOA, Régio da Cruz Salu, ne’ebé reprezenta família vítima dezastre naturál sira, hato’o agradesimentu ba Governu Sentrál tanba la haluha preokupasaun komunidade afetadu sira iha rai-ketan Oekusi.

“Apoia ne’e sinál atu hamaran vítima sira-nia mataben, ne’ebé terus bainhira hetan dezastre ba ai-han uma, anin sobu uma no inundasaun, nu’udar Autoridade másimu iha Oekusi, agradese ba Governu Sentrál, tanba dadus sira-ne’e tama iha tinan kotuk, maibé lahaluha to’o ohin konsege fó duni apoia ba família 28 ne’e, ami espera katak, família sira seluk seidauk hetan apoia, sei hetan tan iha tempu tuirmai,” nia hateten ho orgullu.

Entretantu, família vítima dezastre naturál sira simu apoia pakote ne’e hamutuk ho fundu mão-de-obra nian tuir tipu tolu:

• Aat totál: Simu materiál rekuperasaun ho fundu mão-de-obra $1,000.00 USD kada família.
• Aat natón: Simu materiál rekuperasaun ho fundu mão-de-obra $750.00 USD kada família.
• Aat kamán: Simu materiál rekuperasaun ho fundu mão-de-obra $650.00 USD kada família.

Notísia relevante:SEPS oferese materiál konstrusaun ho osan ba vítima dezastre 17 iha Oekusi

Jornalista: Abílio Elo Nini

Editór: Rafael Ximenes de A. Belo