g7+ atualiza progresu no programa foun ba PM Xanana
DILI, 30 Jullu 2026 (TATOLI)—Membru g7+, kinta ne’e, hala’o enkontru hodi atualiza progresu servisu no programa foun ba Primeiru-Ministru, Kay Rala Xanana Gusmão, ne’ebé sai hanesan Pesoa Eminente organizasaun internasionál g7+ nian.
“Hanesan ita-boot sira hatene katak ha’u nu’udar pesoa eminente iha g7+, entaun sira husu ha’u mai atu rona saida mak sira atu informa kona-ba servisu ne’ebé sira halo tiha ona,” Primeiru-Ministru no pesoa eminente g7+, Kay Rala Xanana Gusmão, relata ba jornalista sira iha edifísiu g7+, Formosa, ohin
Pesoa eminente G7+ ne’e dehan, ohin membru sira informa ba nia katak g7+ iha ninia misaun ida mós atu ba akompaña eleisaun la’ós de’it iha nasaun membru g7+ maibé mós iha nasaun seluk ne’ebé la envolve iha organizasaun internasionál ida-ne’e.
“Hanesan foin dadauk ne’e sira ba akompañia prosesu eleisaun iha São Tomé Príncipe, illa Salomaun, kuaze eleisaun la’o ho di’ak. Klaru katak iha prosesu eleisaun hotu-hotu sempre iha problema maibé buat hotu la’o di’ak,” PM Xanana haktuir.
Aleinde ne’e, Xefe Governu ne’e hateten nasaun Yemen enfrenta problema oioin maibé sira tenke impulsu sira-nia situasaun, nune’e iha fulan-Agostu ne’e delegasaun boot ida husi Yemen sei mai Timor. Sira mai la’ós atu aprende maibé sira mai atu haree Timor-Leste nia esperiénsia Estadu diálogu rekonsiliasaun.
“Ne’ebé sira mai ita sei oferese saida mak ita iha katak saida mak ita bele atu ajuda sira, hodi hatudu katak papel g7+ iha mundu hahú rekoñese ona no rai seluk mós hakarak aplika (integra) iha g7+,” nia dehan.
Xefe Governu ne’e afirma katak nasaun sira-nia integrasaun la’ós ita atu hanorin maibé atu troka esperiénsia iha kestaun Estadu ne’ebé pás no estabilidade.
“g7+ mós sei sai observadór iha CPLP iha fulan-oin (Agostu) hodi halo diálogu atu promove pás no estabilidade husi konflitu sira-ne’ebé akontese iha nasaun frajíl,” nia dehan.
Jornalista : Alexandra da Costa
Editór : Cancio Ximenes
