Juiza Ana Paula Fonseca klarifika mandadu detensaun ba membru PCIC ho insiál DdS
DILI, 30 Jullu 2026 (TATOLI)–Juiza Direitu Ana Paula Fonseca, klarifika, desizaun hasai mandadu detensaun iha Kuarta (29/07), hodi detein membru Polísia Sientífika Investigasaun Kriminál (PCIC, sigla portugés) ho inisiál DdS ne’e laiha motivu polítika ida.
“Despaisu mandadu detensaun ba arguidu foin lalais ne’e tanba Tribunál atu asegura arguidu ba nia prezensa iha leitura akordaun, tanba antes ne’e, Tribunál notifika arguidu mai tuir desizaun maibé la marka prezensa, tanba ne’e mak Tribunál hasai mandadu detensaun ida ba PNTL hodi halo kaptura ba arguidu. Ha’u nia serbisu laiha intervensaun husi polítika na’in sira. Ha’u mai la’ós interrese ema ida nia. Tanba ne’e informasaun husi mídia ne’e laloos no la’ós ligasaun ho kazu dezentendimentu entre PCIC no DSIK foin lalais ne’e,” Juiza Ana Paula Fonseca, hato’o iha sala julgamentu Tribunál Judisiál Primeira Instánsia Dili (TJPID), Kaikoli, Kinta ne’e.
Hafoin halo esklaresimentu ba asuntu ne’e, Juiza mós halo kedan leitura akordaun ba kazu membru PCIC ho inisiál DdS ba krime obtrusaun autoridade públika ne’ebé envolve iha tinan 2024.
Iha leitura akordaun ne’ebé lee sai, fundamenta katak Tribunál haree ba produsaun provas,ne’ebé laiha prova ruma atu kondena arguidu, tanba ne’e mak absolve arguidu.
“Ba kazu ida-ne’e depois Tribunál haree produsaun de provas, Tribunál haree katak laiha prova ruma hodi kondena arguidu. Tanba ne’e, Tribunál deside hodi absolve arguidu husi krime obstrusaun públika sein kustu,” nia akresenta.
Notísia relevante: Tribunál hatún despaisu liberta hikas detidu DdS husi sela detensaun
Antes ne’e, iha MP nia alegasaun, husu Tribunál atu absolve arguidu DdS tanba konsidera halo krime obstrusaun ba autoridade públia ne’ebé akuza ba arguidu la priense ba elementu krime.
Iha audiénsia julgamentu, MP deklara antes ne’e arguidu deklara arguidu nia liman la kona ofendidu FGS, maibé konsege tafui de’it kaben dala-ida ba ofendidu no arguidu mós la lori pistola bainhira tun husi karreta. Arguidu mos rekoñese, mosu duni diskusaun, maibé iha arguidu no ofendidu nia kolega sira konsege hafahe tiha, tanba ne’e arguidu nia liman la kona ofendidu.
MP esplika iha deklarasaun, ofendidu deklara katak, arguidu nia liman la kona ofendidu, maibé tafui de’it kaben no mosu duni diskusaun, maibé la konsege liman kona malu, tanba kolega sira hafahe tiha no ofendidu rasik mak halo auto-notisia haruka ba MP. Depois rona sasin na’in-rua hanesan arguidu ho ofendidu nia kolega serbisu deklara katak, arguidu liman la kona lezadu, maibé tafui de’it kaben dala ida.
Sasin sira haree arguidu la lori pistola. No depois akontese tiha diskusaun, arguidu fila bá uma, ofendidu kontinua hala’o nia serbisu pikete to’o oras ramata mak foin fila. Tanba ne’e, MP haree katak arguidu nia aktu la priense ba krime obstrusaun ba autoridade públiku,.
Maibé parte Defeza, konkorda ho MP nia alegasaun nune’e husu Tribunál atu absolve arguidu.
Akuzasaun
Tuir akuzasaun katak iha loron 14 Juñu 2024, ofendidu hala’o hela serbisu iha edifísiu PCIC.
Iha momentu ne’ebá ofendidu simu mensajen husi arguidu liu husi Whatsapp, ho liafuan la di’ak.
Haree tiha mensajen ne’e, ofendidu informa kedan ba nia kolega ida atu kontrola arma no dezarma husi arguidu nia pose.
Liutiha minutu balu, arguidu mós to’o ba iha edifisiu PCIC ko’alia ho lian maka’as, bolu ofendidu atu tuku malu ho ofendidu no tafui kaben ba ofendidu.
Husi ne’ebá arguidu no ofendidu la konsege tuku malu, tanba iha membru balu husi PCIC mak dada netik sira no ikus mai arguidu fila bá uma.
Konsekuénsia husi arguidu nia hahalok ne’e halo ofendidu sente tauk no abandona serbisu pikete.
Tanba ne’e, MP akuza arguidu hanesan autór materiál ba krime obstrusaun autoridade públika ne’ebé previstu iha artigu 243 husi Kódigu Penál Timor-Leste.
Audénsia julgamentu ne’e, prezide husi Juíz Kolektivu, José Maria, Ercilia de Jesus, Ana Paula, MP reprezenta husi Prokuradór Aderito Tilman, arguidu hetan asisténsia legál husi Defensor Públiku Fernando de Carvalho.
Jornalista : Natalino Costa
Editora : Julia Chatarina
