Tribunál aplika medida tolu ba arguidu scam call center iha Kampung Baru
DILI, 30 Jullu 2026 (TATOLI)–Tribunál Judisiál Primeira Instánsia, Kinta ne’e, halo ona interrogatóriu dahuluk ba suspeitu hamutuk na’in-62 ne’ebé alegadamente envolve krime scam call center iha Kampung Baru, ne’ebé iikus mai Autoridade Seguransa detein iha Segunda (27/07).
Iha interrogatóriu dahuluk, Juíz Turnu José Quitão halo uluk identifiksaun ba arguidu-62, nune’e iha momentu ne’e arguidu balun hili direitu ko’alia no balun hili direitu nonok.
Ministériu Públiku (MP) ne’ebé reprezenta husi Prokuradór Matias Soares promove arguidu ho krime burla informátika, esplorasaun jogu ilísitu, brankamentu kapitál no asosiasaun kriminozu.
MP durante alegasaun husu ba Tribunál atu aplika medida kausaun ho montante $2.000 ba kada arguidu, enkuantu sidadaun Indonézia na’in-rua aplika prizaun preventiva.
Notísia relevante : Tribunál aplika kausaun $2.500 ba kada arguidu suspeitadu atividade scam iha Kampung Baru
Maibé husi parte Defeza husu ba Tribunál halo libertasaun emediata no aplika de’it Termu Identidade Rezidénsia (TIR) tanba faktu sira ne’ebé aprezenta la sufisiente, tanba ne’e labele aplika medida sira.
Nune’e, ikus mai Tribunál aplika medida tolu hanesan TIR, aprezentasaun períodika ne’ebé permite arguidu sira aprezenta-an iha Eskuadra besik semana ida dala-ida no proibisaun auzénsia. Tribunál la aplika medida kausaun ba arguidu sira tanba sira osan laiha.
Tribunál husu atu arguidu sira labele sai husi territóriu nasionál hafoin hetan aplikasaun medida tolu no husu ba arguidu sira atu entrega sira-nia pasaporte ba parte Servisu Migrasaun hodi kontinua asigura arguidu sira-nia movimentu iha territóriu nasionál.
Jornalista : Natalino Costa
Editora : Julia Chatarina
