Komisaun A vizita Filipina no Tailándia hodi halo estudu komparativu ba implementasaun Lei Sibernétika
DILI, 31 Jullu 2026 (TATOLI)-Deputadu sira iha Komisaun A ne’ebé trata Asuntu Konstitusionál no Justisa hala’o viajen bá Filipina no Tailándia, iha loron 01 Agostu, ho objetivu atu halo estudu komparativu hodi haree referénsia ba implementasaun Lei Sibernétika, Siberseguransa no Protesaun Dadus.
Vise-Prezidente Komisaun A, António Verdial de Sousa, dehan deputadu sira iha Komisaun ohin halo ona reuniaun hodi hetan briefing téknika antes hala’o viajen traballu.
Komisaun hili nasaun rua ne’e tanba hanesan país membru Asosiasaun Nasaun Sudeste Aziátiku (ASEAN, sigla inglés) ne’ebé nia implementasaun ba lejizlasaun sira ne’ebé forte. Viajen ne’e hala’o durante durante loron ualu ho foku viajen bá uluk Tailándia hafoin kontinua bá Filipina.
“Lei ne’e iha nesesidade urjente, atu haree daudaun atividade scame online buras iha rai-laran hodi kontrola liután”, nia hateten.
Tuir planu, Komisaun iha fulan-Setembru tinan ne’e sei realiza semináriu internasionál kona-ba Lei Sibernétika hodi konvida peritu sira no rona sira-nia hanoin.
Ba Komisaun, lejizlasaun ne’e importante tebes ba prosesu transformasaun dijitál no seguransa iha setór dijitál nian.
Aleinde ne’e, atu regula utilizadór mídia sosiál balun, ne’ebé uza identidade falsa hodi ataka ema seluk ho linguajen la edukativa, ne’ebé sai preokupasaun boot no hatudu lakon morál iha sosiedade ne’ebé nakonu ho valór kulturál no relijiaun oioin.
Notísia relevante: Proposta-lei sibernétika iha ona diskusaun finál no hein submete ba PN
Jornalista: Nelson de Sousa
Editora: Maria Auxiliadora
