Komunidade Bobonaru husu Governu finaliza lalais reabilitasaun irrigasaun Maliana I
MALIANA 31 Jullu 2026 (TATOLI) – Komunidade no agrikultór sira iha área Irrigasaun Maliana I, munisípiu Bobonaru, husu ba Governu atu finaliza lalais reabilitasaun irrigasaun no kalla (talang) bee iha Buipira, antes tama ba tempu udan, nune’e bee bele filafali ba natar sira no agrikultór sira bele kontinua hala’o atividade agríkola.
To’os-na’in Adelina de Jesus hatete katak rai-halai ne’ebé danifika ona kalla bee no parte husi sistema irrigasaun halo bee labele distribui normal ba natar sira hanesan uluk. Tanba ne’e, nia husu ba Governu atu aselera serbisu reabilitasaun atu sistema irrigasaun bele funsiona filafali.
“Ami husu Governu atu aselera reabilitasaun ba irrigasaun no talang bee iha Buipira bainhira tempu udan to’o bee bele la’o normal tama ba natar sira, tanba agora bee mai hela, maibé uitoan de’it”, nia hato’o.
Natar-na’in José Lopes Talo mós hatete katak durante époka bailoro tinan ida-ne’e, agrikultór balun seidauk bele halo natar no atividade ortikultura tanba bee la to’o, liuliu ba natar sira ne’ebé lokaliza iha parte ikus.
“ee mai uitoan de’it no la to’o ba ami-nia natar sira. Ami hein Governu hadi’a lalais irrigasaun atu ami bele halo natar tinan ida dala-rua. Agora ami atu halo más ta’uk bee laiha, tanba ami rona informasaun ema atu hadi’a ona ne’e mak ami hein hela. Hadi’a lalais ba para hotu ne’e ami bele kuda fali hare no modo”, dehan.
Diretór Servisu Munisipál Agrikultura Bobonaru, Longuinhos João, esplika katak atividade agríkola iha Irrigasaun Maliana I suspende temporariamente, tanba Governu prepara hela faze reabilitasaun sistema irrigasaun no konstrusaun kalla bee foun.
Nia dehan projetu ne’e importante atu hadi’a distribuisaun bee ba natar sira no aumentu produsaun agríkol iha munisípiu Bobonaru. “Husu ba agrikultór sira pasiénsia uitoan. Ita-nia irrigasaun ne’e di’ak fali mak ita hotu-hotu foin bele halo atividade agrikola”, nia salienta.
Notísia relevante: Rai-halai kauza danu ba irrigasaun Maliana I
Irrigasaun Maliana I reabilita dahuluk husi Ajénsia Kooperasaun Internasionál Japaun (JICA) entre tinan 2008 no 2009, hanesan parte husi apoiu povu Japaun nudar sinál amizade no kooperasaun entre nasaun rua.
Tuir dadus, irrigasaun ne’e fornese bee ba natar hamutuk ektare 1.050-resin pertense suku Lahomea, Raifun, Ritabou no Odomau.
Notísia relevante: MAPPF orienta PT. Minarta normaliza irrigasaun Maliana I
Jornalista: Sergio da Cruz
Editora: Maria Auxiliadora
