Komunidade husu hadi’a kampu futeból Maliana
BOBONARU, 31 Jullu 2026 (TATOLI) – Kampu Futeból Maliana iha tinan barak nia laran seidauk reabilita, tanba ne’e komunidade no jogadór sira iha munisípiu Bobonaru husu Governu atu presta atensaun.
Jogadór Lorenço de Jesus hateten kondisaun kampu ne’ebé nakonu ho fatuk no du’ut mate halo sira sempre kanek durante kompetisaun no treinu, tanba difikulta tebes jogadór sira atu kontrola bola.
“Ami husu ba Governu atu tau-matan netik ba kampu ida-ne’e. Halo hanesan kampu ida modernu, simples, importante nia du’ut tenke matak no furak, tanba kampu ida-ne’e prodús jogadór barak. Balun agora reforsa hela selesaun nasionál, maibé kampu ida-ne’e ninia kondisaun mak aat, tanba du’ut maran hotu no foer nakonu iha laran, depois besi baliza nian mós tohar hotu ona”, Lourenço dehan.
Aleinde ne’e, Zeca da Costa nu’udar membru komunidade Maliana sujere ba Governu atu tau prioridade ba kampu ne’ebé lokaliza iha sentru kapitál munisípiu Bobonaru.
Notísia relevante: Kuda Ulun festeza “Together We Rise” ho “Together Tebe Dahur” iha kampu futeból Maliana
Nia akrexenta katak tinan-tinan komunidade uza kampu ne’e ba kompetisaun no atividade desportiva, maibé to’o agora seidauk halo reabilitasaun. “Tinan-tinan ema joga iha laran, rai-rahun sa’e hanesan ahi-suar ne’e, ema haree ladún di’ak”, nia dehan.
Iha parte seluk, fanátiku futeból Adelino Afonso sujere atu kontrata seguransa permanente hodi tau-matan ba kampu futeból Maliana, tanba rede ne’ebé instala dala barak hetan estragu husi ema deskoñesidu.
“Rede sira agora nakles hotu ona, ema no animál tama livre. Agora duut maran bee animál laiha, mais tempu udan du’ut naruk, karau ho bibi mak nakonu iha laran”, dehan.
Komunidade espera Governu fó prioridade ba reabilitasaun kampu, tanba ida-ne’e kontribui ona ba dezenvolvimentu talentu futeból iha Bobonaru.
Aleinde uza kampu ba atividade desportiva, utiliza mós ba eventu nasionál sira hanesan komemorasaun Loron Restaurasaun Independénsia, Proklamasaun Independénsia no eventu importante seluk ne’ebé Governu no Autoridade Munisípiu Bobonaru organiza.
Notísia relevante: Abertura Telkomcel Cup iha Maliana, AS Fition manán Kuda-ulun 1:0
Jornalista: Sergio da Cruz
Editora: Maria Auxiliadora
