BOBONARU, 27 Outubru 2025 (TATOLI)–Populasaubn atus ba rihun husi suku 50, Postu Administrativu neen (6) hatais kamizola mutin ne’ebé hakór ho bandeira Timor-Leste no ASEAN “Together We Rise” hodi konsentra hamutuk iha Kampu Futeból Maliana, atu selebra Repúblika Demokrátika Timor-Leste adere sai membru plenu ASEAN ba da-11, domingu (26 Outubru 2025) ne’e.
Notísia Relevante: Ofisialmente Timor-Leste sai membru ASEAN, PM Xanana : “Ami prontu servisu hamutuk”
Foinsa’e sira, labarik estudante sira, inan-aman hamutuk ho makaer ukun tomak iha Maliana. Sira hotu-hotu hatais kamizola mutin be infeita ho bandeira Timor-Leste no ASEAN ne’e, sai duni símbólu haksolok no unidade. Kamizola mutin sai sasin ba Timor-Leste nia adezaun ba ASEAN. Nune’e, populasaun Bobonaru-Kuda Ulun festeza Timor-Leste adere ba ASEAN “Togteher We Rise” ho “Together Tebe Dahur” iha Kampu Futeból Maliana.
Sira festeza eventu istóriuku ne’e hananu tebe-tebe. Tebe sira tebe hamutuk. Haksoit sira haksoit ho kontente. Sira espera sira-nia domin ba Timor-Leste hodi promove sira-nia identidade no kultura Kemak no Bunak liuhsui hatais treje tadisionál tais Maliana nian. Entre kór bandeira Timor-Leste no ASEAN nia leet ne’e, iha espresaun domin ida kle’an ba Timor-Leste.
Reprezentante Juventude Maliana, Antonio Soares Afonso, hateten atividade ne’e nu’udar forma agradesementu no orgullu ba Timor-Leste nia susesu iha nivel nasionál no rejionál.
“Ami sente orgullu halo parte iha nasaun ida-ne’ebé kontinua progresu no agora besik liu ba família ASEAN. Kamizola TL-ASEAN sira-ne’e simboliza espíritu unidade no esperansa foun ba Timor-Leste,” Antonio hateten ba Agência Tatoli iha kampu Futeból Maliana, domingu ne’e
Prezidente Autoridade Munisípiu Bobonaru, Paulo Moniz Maia, hateten nia orgullu no konsidera vitória ne’ebé Timor-Leste hetan la’os fasíl maibé lori prosesu naruk ida.
ASEAN iha pilár tolu hanesan Pilar dahuluk mak Politika no seguransa, daruak ekonomia no pilár datoluk nia mak sosiu kulturál. Husi pilár tolu ne’e, Paulo Moniz Maia, argumenta pilár daruak mak sai importante no dezafiu boot ba Timor-leste.
Prezidente Autoridade Munisipál Bobonaru hatutan nu’udar membru foun ita sei halo esforsu boot nesesáriu pós adezaun hodi bele tulun Timor-Leste atu sai pais ida maske foun iha ASEAN maibé bele iha buat ruma ida-ne’ebé bele oferese ba ASEAN hodi prienxe prinsipiu ida Resiprokál.
“Katak ita hetan no saida mak ita merese fó iha kontestu ekonomía. Todan boot ida ba ita, maibé hamutuk ho ASEAN ita sei bele dezenvolve ita-nia ekonomía sai forte no bele kompete iha merkadu boot ASEAN,” nia dehna.
Nia dehan, ho TL nia adezaun ba ASEAN ne’e, Timor-Leste mós sei hetan tulun barak iha aspeitu seluk hanesan Politika ho Seguransa no sosiu kultura.
“Dezde Timor-Leste jeografikamente lokalizadu iha kontinente Azia no besik-liu ba país membru ASEAN sira. Tanba ne’e ita merese duni hamutuk ho ASEAN hodi fortalese liután ita-nia ekonomía no ita-nia seguransa no dezefa hodi garantia estabilidade nasionál,” nia dehan.
Enkuantu, eventu ne’e konklui ho orasaun koletivu ba nasaun nia progresu no prosperiedade, no mós kompromisu husi komunidade Bobonaru atu kontinua fó apoiu ba esforsu Governu nian hodi hametin Timor-Leste nia pozisaun iha ASEAN nia laran.
Notisía Relevante: PM Xanana : Adezaun ba ASEAN reflete TL nia kompromisu firme ba kooperasaun rejional
Jornalista : Sergio da Cruz
Editór : Cancio Ximenes
