PM Xanana dezloka ba Austrália atu partisipa festivál “Garma” 2026

DILI, 31 Jullu 2026 (TATOLI)—Primeiru-Ministru, Kay Rala Xanana Gusmão, sesta ne’e, dezloka ba Austrália tanba simu konvite ofisiál husi Yothu Yindi Foundation (YYF) hodi partisipa festivál “Garma” 2026 ne’ebé hala’o iha Gulkula Arnhem Land (Norte Austrália) durante loron tolu hahú husi 31-03 Agostu 2026.

Primeiru-Ministru, Kay Rala Xanana Gusmão, hamutuk ho delegasaun dezloka ba Austrália ho aviaun Quantas, maizumenus iha tuku 15h06 lorokraik no delegasaun Timor-Leste sei fila mai Timor-Leste iha 03 Agostu.

Festivál “Garma” konsidera hanesan festivál indígena (rai-na’in) boot ida no importante liu iha Austrália. Eventu ne’e la’ós de’it selebra kultura no tradisaun komunidade indígena Austrália, maibé mós sai plataforma ida atu hametin ligasaun ho povu indígena husi nasaun sira seluk, inklui Timor-Leste no nasaun Pásifiku sira.

Bazeia ba ajenda ne’ebé TATOLI asesu katak iha festivál ne’e, Xefe Governu Timor-Leste sei partisipa nu’udár oradór prinsipál (Keynote Speaker) no bainaka espesiál iha enkontru kulturál entre lideransa, komunidade indígena no partisipante sira.

Festivál Garma 2026 ne’e organiza husi Yothu Yindi Foundation, ne’ebé sei aprezenta kultura Yolngu liuhosi tradisaun, knananuk, dansa, konta istória no partilla koñesimentu tradisionál.

Eventu ne’e sai hanesan pontu enkontru importante bá komunidade, família, líder kulturál, artista, foinsa’e, líder polítiku, akadémiku no reprezentante seitór privadu sira.

Enkuantu misaun kulturál prinsipál husi festivál ne’e mak atu kria ambiente ida-ne’ebé fó espasu bá espresaun no aprezentasaun sistema koñesimentu no kostume tradisionál Yolngu nian, no fahe pratika sira iha ambiente kulturál autentiku.

Tanba ne’e, ema rihun bá rihun sei halo viajen bá Arnhem Land iha semana ida-ne’e hodi partisipa iha Festivál Garma.

Jornalista : Alexandra da Costa

Editór        : Cancio Ximenes