Bele uza AI iha prosesu notísia maibé tenke mantein kredibilidade
PEKIN, 02 Agostu 2026 (TATOLI)—‘New Media Application Practices in the AI Era”, lori mudansa boot ba mundu komunikasaun ne’ebé bele fasilita no halais prosesu notísia ho rapidéz, maski nune’e tenke mantein kredibilidade.
Che Ran, Xefe Editór ba New Media Editorial Department CGTN husi China Media Group, liuhusi formasaun ba da-19 ho tema ‘New Media Application Practices in the AI Era”, iha Pekin, Domingu ne’e, aprezenta katak iha era Artefisiál Intelijénsia lori mudansa boot ba mundu komunikasaun, tanba mídia la’ós de’it ona husi ekipamentu modernu no dijitál sira, maibé kombinasaun ona husi interativu AI iha ne’ebé AI bele muda kria konteúdu ajuda jornalista sira atu serbisu ho lalais liu iha parte testu notísia, caption no halo tradusaun lais liu.
Aleinde ne’e mós AI bele jere imajen, edita vídeo, kria avatar, tau sub-títulu automátiku no halo dublajen iha tempu reál. Tanba ne’e, AI muda personalizasaun maka’as iha plataforma sira hanesan Tiktok no aplikasaun seluk.
Liuhusi prezensa AI, mídia bele prodús konteúdu barak liu, husi problema menus rekursu bele alkansa planu kobertura sira no AI bele halo servisu ema na’in-rua ka tolu nian no seluk tan.
Maibé, tuir nia, utilizasaun AI iha servisu sira liuliu servisu jornalizmu nian iha mós dezafiu kona-ba informasaun “deepfake”, nune’e kada jornalista prezisa mantein halo verifikasaun literasia notísia nian. Tanba dala ruma AI bele tuir de’it dadus ne’ebé bias.
Nune’e, Che Ran informa, papél editór nafatin importante halo mudansa servisu ba obra jornalista nian, muda husi hakerek sira liuhusi editasaun no hala’o hikas verifikasaun antes publika notísia, tanba objetivu prinsipál husi AI mak atu ajuda servisu jornalístiku, maibé jornalista mak halo desizaun.
Portantu, tuir reprezentante jornalista Timor-Leste, Tomás Brites katak AI nu’udár teknolojia intelijénsia artifisiál ne’ebé dezeña atu permite komputadór sira atu aprende, hanoin no hala’o knaar espesífiku sira ho intelijente, hanesan ema mak servisu.
Nia dehan AI “iha sentimentu” hanesan ema. AI funsiona hodi aprende padraun sira hosi dadus no uza padraun sira-ne’e hodi hamosu resposta sira ka foti desizaun sira bazeia ba ninia prosesu operasionál sira.
“AI ajuda ita halo servisu maibé ema mak tenke matenek utiliza AI,” nia dehan.
Jornalista Timor-Leste na’in-24 ne’ebé oras ne’e tuir formasaun iha Pekin maihusi mídia privadu no estatál rua hanesan RTTL no TATOLI, fasilita husi embaixada Xina iha Timor-Leste, hodi partisipa semináriu ne’ebé organiza husi China International Communications Group (CICG) durante loron 20, hahú husi 16 Jullu to’o 04 Agostu 2026.
Jornalista: Osória Marques
Editór: Xisto Freitas da Piedade
