Ekipa Konjuta detein sidadaun estranjeiru na’in-hitu suspeitadu atividade scam iha Fatuhada

DILI, 03 Agostu 2026 (TATOLI)–Ekipa Konjunta kompostu husi Diresaun Servisu Investigasaun Kriminál (DSIK) no Diresaun Servisu Informasaun Polísia (DSIP), inklui Forsa Polísia (FP) hamutuk ho Servisu Migrasaun (SM) halo operasaun konjunta iha Segunda ne’e, nune’e konsege desmantela atividade scam call center iha apartamentu ida-ne’ebé lokaliza iha Suku Fatuhada, Postu Administrativu Dom Aleixo, Munisípiu Dili.

Iha operasaun ne’e, ekipa konjunta konsege identifika xineza na’in-neen inklui sidadaun feto ida husi Vietname, nune’e ekipa asegura no detein kedan suspeitu na’in-hitu iha sela detensaun.

Notísia relevante : Tribunál aplika medida tolu ba arguidu scam call center iha Kampung Baru

Ekipa konsege halo apreensaun ba sasán sira ne’ebé uza atu apoia atividade ne’e hanesan telemóvel hamutuk 30, ekipamentu Starlink rua no iPad hamutuk tolu.

Hafoin ne’e, Autoridade Seguransa lori bá edifísiu DSIK iha Kuartél Jerál Polísia Nasionál Timor-Leste (PNTL) Kaikoli hodi hala’o prosesu investigasaun hafoin entrega ba Ministériu Públiku hodi kontinua halo prosedimentu no dispozisaun lei ne’ebé vigora iha Timor-Leste.

Rekorda fali katak iha Sesta (31/07) ne’e Autoridade Seguransa mós asegura no detein suspeitu na’in-tolu ne’ebé suspeitadu envolve krime scam call center.

Jornalista     : Natalino Costa

Editora          : Julia Chatarina