Kandidatu na’in-62 Akademia Militár Konjunta admitidu
DILI, 03 Agostu 2026 (TATOLI)–Ministériu Defeza, Segunda ne’e, publika ona lista naran kandidatu na’in-63 ne’ebé admitidu iha vaga Akademia Militár Konjunta.
Nune’e, iha tempu hanesan, Ministériu Defeza liuhusi Institutu Defeza Nasionál (IDN) husu ba kandidatu sira atu aprezenta-an iha edifísiu institutu iha Palásiu Governu, maibé iha aprezentasaun kandidatura ne’e, iha kandidatu na’in-ida mak la marka prezensa.
“Kandidatu hamutuk 62 husi totál 63 ne’ebé Ministériu Defeza aprova ona ba Konkursu Admisaun Akademia Militár Konjunta marka prezensa iha Institutu Defeza Nasionál Dili, atu aprezenta-an no simu orientasaun ofisiál molok partisipa iha Prova Aptidaun Militár ne’ebé sei realiza iha Akademia Militár Munisípiu Aileu,” referidu nota ne’ebé Ajénsia TATOLI asesu, Tersa ne’e.
Notísia relevante: Kandidatu estudante na’in-63 Akademia Militár Konjunta hakat ba teste aptidaun
Tuir Komisaun Rekrutamentu no Admisaun Akademia Militár Konjunta, kandidatu ne’ebé la marka prezensa entrega ona karta justifikasaun, kona-ba nia razaun auzénsia tanba hetan bolsa estudu atu kontinua nia estudu iha Indonézia.
Iha atividade ne’e, Komisaun entrega formalmente lista kandidatu sira ne’ebé kualifika ba faze Provas Aptidaun Militár, ba Komandu Akademia Militár Konjunta. Nune’e, serimónia ne’e marka ramata faze rekrutamentu no hahú faze preparasaun no akompañamentu kandidatu sira.
Prezidente Komisaun Rekrutamentu no Admisaun Akademia Militár Konjunta, Nuno Corvelo Sarmento, hateten, faze Prova Aptidaun Militár ne’e reprezenta etapa importante ida iha prosesu selesaun ba futuru kandidatu sira.
Aleinde ne’e, termu entrega lista kandidatu ne’e simboliza transferénsia responsabilidade atu kontinua orienta, akompaña no prepara kandidatu sira durante prosesu tomak to’o ramata formasaun.
Atividade aprezenta-an realiza tuir kalendáriu konkursu atu fó informasaun kompleta ba kandidatu sira kona-ba etapa sira tuirmai, inklui disiplina, prosedimentu administrativu, ekipamentu pesoál ne’ebé tenke prepara no regra sira ne’ebé sei aplika durante realizasaun provas aptidaun militar.
Iha parte seluk, Komandante Akademia Militár Konjunta, Kapitaun Fragata Duarte Borges Loe informa, tuir planeamentu, kandidatu sira sei konsentra iha Kuartél Jenerál F-FDTL, Fatuhada, iha loron 07 Agostu 2026, ne’ebé iha momentu ne’ebá família sira bele akompaña molok Komandu Akademia Militár Konjunta lori sira bá Aileu.
Bainhira to’o iha Akademia Militár Aileu, kandidatu sira sei tuir programa preparasaun ne’ebé estrutura Akademia organiza durante semana ida, molok hahú Prova Aptidaun Militár.
Kandidatu sira mós sei partisipa iha komemorasaun loron FALINTIL ba dala-51 iha Foho Matebian, Munisípiu Baukau, atu fó omenajen ba eroi no veteranu sira ne’ebé luta ba Independénsia Timor-Leste.
Hafoin komemorasaun ramata, kandidatu sira sei filafali bá Akademia Militár Aileu atu kontinua tuir programa preparasaun no tuir Prova Aptidaun Militár kontinuasaun, hanesan parte husi konkursu admisaun Akademia Militár Konjunta. Kandidatu sira ne’ebé pasa etapa ida-ne’e sei prepara-an ba abertura ofisiál Ano Zero ne’ebé planeia atu hahú iha Setembru 2026.
Lista kandidatu sira ne’ebé hetan admisaun ba Prova Aptidaun Militár aprova liuhusi Despaisu n.º 46/GMD/IXGC/2026, loron 29 Jullu 2026, ne’ebé asina husi Ministru Defeza, Kontra-Almirante Donaciano do Rosário da Costa Gomes.
Ministériu Defeza konsidera etapa aprezentasaun no orientasaun ida-ne’e nu’udar medida importante atu garante preparasaun di’ak, organizasaun no disiplina antes kandidatu sira tama ba faze Prova Aptidaun Militar. Tanba ne’e, husu ba kandidatu sira hotu atu kumpre rigorozamente oráriu, prosedimentu no instrusaun sira ne’ebé determina ona.
Konkursu Admisaun Akademia Militár Konjunta nu’udar parte husi estratejia IX Governu liuhusi Ministériu Defeza atu dezenvolve rekursu umanu militár ne’ebé profesional, disiplinadu no iha kompeténsia a’as hodi asegura kontinuidade lideransa no reforsa kapasidade operasionál FALINTIL–Forsas Defeza Timor-Leste (F-FDTL) iha futuru.
Jornalista : Natalino Costa
Editora : Julia Chatarina
